DILI, STLTIMORLESTE.com – Akademista sira konsidera, Rezolusaun Nú. 03/CCF-5°/VIII/2026 ne’ebé deklara Frente Revolusionaria Timor Leste Independente (FRETILIN) sei fo prioridade ba partidu no povu Timor-Leste, no sei la aprezenta kandidatura rasik ba Eleisaun Prezidensiál tinan 2027, hanesan parte husi estratéjia politika partidu nian.
Iha entrevista ho STL, Segunda (01/09/2026), Akademista UNTL, Januario hatete, desizaun ne’e hatudu FRETILIN hakarak konsolida aan interna molok tama ba kompetisaun politika boot.
“Rezolusaun ne’e hatudu katak FRETILIN hakarak fó prioridade ba konsolidasaun partidu no interese povu nian duké fó prioridade ba figura ida nian de’it. Ne’e estratéjia ida atu hametin estrutura partidu nian,” dehan Januario.
Nia hatutan, la aprezenta kandidatura rasik la signifika katak, FRETILIN la iha influensia iha eleisaun prezidensiál 2027.
“Maski la aprezenta kandidatu rasik, FRETILIN sei kontinua iha influensia makaas. Partidu ne’e bele apoiu kandidatu independente ka forma koligasaun ho partidu seluk, depende ba konjuntura politika iha tempu ne’ebá,” nia esplika.
Tuir nia, desizaun ne’e mos bele evita konflitu interna no fó tempu ba FRETILIN, atu prepara programa diak liu ba eleisaun parlamentar no prezidensial iha futuru.
Iha fatin ketak, Observador Politika, Antonio Magno hatete, desizaun FRETILIN la aprezenta kandidatura rasik ba Prezidensial 2027 hanesan kalkulu politika ne’ebé matenek, tanba bele fó dalan ba FRETILIN atu sai negosiador prinsipal ba kandidatu sira ne’ebé sei kompete.
“Ita haree katak Rezolusaun ne’e la’os frakeza maibé forsa ba FRETILIN, tanba ho desizaun ne’e FRETILIN bele konsentra liu ba organizasaun partidu nian, no buka dalan diak liu hodi kontribui ba estabilidade politika nasional iha eleisaun 2027.”dehan Antonio.
Antonio dehan tan, desizaun la aprezenta kandidatura rasik bele loke espasu ba FRETILIN, atu halo dialogu ho forsa politika sira seluk hodi hetan konsensu nasional ba futuru Timor-Leste nian.
Entretantu Rezolusaun refere hetan aprovasaun iha reuniaun Comite Central FRETILIN (CCF) iha loron 29 Agostu 2026, ne’ebé subliña katak prioridade prinsipal partidu nian mak hametin partidu no defende interese povu Timor-Leste.
To’o notisia ne’e publika, lideransa FRETILIN seidauk fó deklarasaun detalladu kona-ba mekanizmu apoiu ba eleisaun prezidensiál 2027.
(car)
