DILI, STLTIMORLESTE.com – Diretor Ezekutivu Banco do Nosso Futuro (BNF), Fausto Bernardino relata atividade bankária durante tinan ida ba Prezidente Repúblika José Ramos Horta, inklui dezenvolvimentu kliente depositante no kliente ne’ebé uza fasilidade kréditu.
Diretor BNF, Fausto Bernardino hato’o informasaun ne’e ba jornalista sira, bainhira remata halo enkontru ho Prezidente Repúblika iha Palásiu Prezidensiál Nicolau Lobato, Bairo Pite, Dili, Segunda (31/08/2026) hatete, enkontru ne’e mós sai oportunidade ba BNF atu konvida Prezidente Ramos Horta ba selebrasaun aniversáriu tinan ida banku nian, ne’ebé sei hala’o iha loron 4 Setembru 2026.
Fausto Bernardino hatete katak BNF hahú operasaun bankária iha Setembru 2025 no agora kompleta ona tinan ida. Tanba ne’e, direksaun BNF mai hasoru Prezidente atu hato’o atualizasaun kona-ba atividade no rezultadu banku nian durante períodu ida-ne’e.
“Banku do Nosso Futuru hala’o ona operasaun bankária tinan ida iha loron 4 Setembru. Nune’e, ohin ami mai hasoru Sua Excelénsia Prezidente Repúblika atu atualiza informasaun relasiona ho atividade bankária ne’ebé tinan ida nia laran ami hala’o, hodi Sua Excelénsia bele akompanha saida mak Banku do Nosso Futuru hala’o to’o ohin loron,” dehan Fausto Bernardino.
Tuir dadus ne’ebé nia aprezenta, to’o 31 Jullu 2026, BNF iha depositante hamutuk 21.000 no kliente ne’ebé uza fasilidade kréditu hamutuk 1.264.
Diretor Ezekutivu BNF mós klarifika katak servisu banku nian la’ós destina de’it ba veteranu, maibé aberta ba komunidade tomak, tanba BNF hetan lisensa atu opera hanesan banku komersiál.
“Banku komersiál atende kualkér kliente ida ne’ebé presiza atendimentu. Iha ne’e la’ós atende de’it veteranu, maibé komunidade ka sosiedade ne’ebé presiza atendimentu bankáriu,” hatete nia.
Nia mós esplika katak, BNF sei presiza tempu atu hetan retornu hosi investimentu ne’ebé halo ba dezenvolvimentu banku nian, tanba investimentu iha setor bankáriu la’ós prosesu ne’ebé bele fó retornu imediatu iha tinan ida nia laran.
“Ida-ne’e normalmente iha kualkér banku. Kualkér investimentu la’ós iha tinan ida nia laran osan ne’ebé investe bele fó fila kedas,” dehan Fausto Bernardino.
Aleinde relata atividade banku nian, BNF mós hato’o konvite ba Prezidente Repúblika atu marka prezensa iha selebrasaun aniversáriu tinan ida BNF iha loron 4 Setembru.
Maibé, Prezidente José Ramos Horta hatete, nia labele partisipa diretamente iha eventu ne’e tanba iha ajenda importante seluk. Maski nune’e, Prezidente sei hato’o mensajen ba selebrasaun aniversáriu tinan ida Banco do Nosso Futuro nian.
(eme)
