DILI, STLTIMORLESTE.com – Urna Preladus Katóliku nain tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes sei too Timor-Leste, aban husi Bali ho aviaun Aero Dili.
Arsebispu Arkedioseze Metropolitana Dili, Dom Virgílio Cardeal do Carmo da Silva, SDB, husu ba estudante sira atu simu pontu toleránsia husi governu, tanba estudante sira sei partisipa iha prosesuan simu urna Preladus sira husi Aeroportu Internasionál Nicolau Lobato ba Tasi Tolu.
“Tuir oráriu CET, aban tuku 01.30 meudia urna Preladus Katóliku sei too Timor-Leste,” Dom Virgílio hatete iha Tasi Tolu, Segunda (31/08/2026).
Urna sira sei simu iha Aeroportu Internasionál Nicolau Lobato husi komisaun governu, ho akompanhamentu parada militar, antes governu entrega urna sira ba Igreja.
Dom Virgílio hatete, serimónia iha Uma Kreda sei halao iha oin VIP, depois urna sira sei translada ba Tasi Tolu. Iha fatin ne’e, urna Dom Alberto Ricardo da Silva sei tau iha altar oin hamutuk ho urna Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes, hodi kontinua selebrasaun Eukaristia.
Depois misa, urna sira sei tau iha fatin ne’ebé prepara ona atu kontinua velada no misa tuir oráriu ne’ebé Igreja fó sai.
Iha 2 Setembru 2026, urna Monsenhor Martinho da Costa Lopes sei translada ba Laleia no iha loron tuirmai lori ba Manatuto atu halao serimónia Estadu. Iha loron hanesan, urna Dom Jaime Garcia Goulart sei lori ba Instituto ISIF Fatumeta, enquanto urna Monsenhor Martinho da Costa Lopes sei lori ba rezidénsia Lahatene.
Urna Preladus na’in haat sei hela iha Tasi Tolu durante loron 10. Durante períodu ne’e, relijiozu, governu, grupu eskola, embaixadór no instituisaun sira sei halao velada no presta omenajen.
Iha 10 Setembru 2026, sei halao misa, inklui vizita Amu Papa Francisco. Depois misa, urna Preladus na’in haat sei translada husi Tasi Tolu ba Sé Katedral Dili atu halao serimónia funerál iha parte liman-los Sé Dili nian.
Kareta ne’ebé sei tula urna Preladus na’in tolu prepara ona iha Tasi Tolu husi komisaun Igreja. Kareta sira infeita ho hena mutin no kinur, ne’ebé reprezenta bandeira Vatikanu, no iha oin tau fotografia kada Preladus.
Dom Jaime Garcia Goulart moris iha Candelária do Pico, Açores, Portugal, iha 10 Janeiru 1908. Nia simu ordenasaun sacerdotal iha 10 Maiu 1931 no mai Timor atu servisu iha área pastorál no formasaun semináriu. Iha 1941–1945, nia sai Administradór Apostóliku Diocese Dili, no iha 1945–1967 sai Bispu primeiru Diocese Dili. Nia rezigna iha 1967 tanba razaun saúde no mate iha 15 Abríl 1997, iha Portugal.
Dom José Joaquim Ribeiro moris iha Degolados, Campo Maior, Portugal, iha 4 Fevereiru 1918. Nia simu ordenasaun sacerdotal iha 25 Agostu 1940 no ordenasaun episcopal iha 27 Abríl 1958. Iha 1965, nia nomeia Bispu Koadjutór Dili no iha 31 Janeiru 1967 sai Bispu Dili, kargu ne’ebé nia kaer to’o 1977. Durante invasaun Indonézia iha 1975, nia sai defensor forte ba povu Timor-Leste. Nia husu rezignasaun iha Maiu 1977 no mate iha 27 Jullu 2002, iha Évora, Portugal.
Monsenhor Martinho da Costa Lopes moris iha Laleia, Manatuto, iha 11 Novembru 1918. Nia estuda iha Semináriu Nossa Senhora de Fátima, Soibada, no kontinua estudu iha Makau. Nia simu ordenasaun sacerdotal iha 18 Abríl 1948. Iha 3 Outubru 1975, nia sai Vigáriu Jerál Diocese Dili. Depois Dom José Joaquim Ribeiro rezigna, Monsenhor Martinho sai Administradór Apostóliku Diocese Dili, husi 1977 to’o 1983.
Monsenhor Martinho sai figura importante iha defesa direitus umanus no povu Timor-Leste durante okupasaun Indonézia. Nia mate iha 27 Fevereiru 1991, iha Lisboa.
Maski kaer autoridade hanesan Administradór Apostóliku Diocese Dili, Monsenhor Martinho la simu ordenasaun episcopal.
(joa)
