DILI, STLTIMORLESTE.com — Ekipa basquetebol Salazar sai manan nain hasoru ekipa basquetebol Savarika ho skor 57:52, iha kompetisaun Liga Nasional Basquetebol Timor-Leste, ne’ebé hala’o iha Ginásio Dili, Sábadu (27/08/2026).
Jogu hahú ho intensidade aas, tanba ekipa rua kontinua halo ataka no defende malu, hodi la fó oportunidade ba adversáriu atu fasil hatama pontu. Iha parte dahuluk, Salazar domina liu iha kontrolu bola, maibé sira dala barak la konsege ezekuta oportunidade ho di’ak. Enkuantu Savarika, bainhira hetan posse bola, konsege ezekuta ataka ho di’ak liu.
To’o minutu 9, Savarika lidera pontu ho 12:9 hasoru Salazar. Depois, iha kontinuidade parte dahuluk, ekipa rua nafatin hatudu jogu ne’ebé di’ak no kompetitivu. Bainhira parte dahuluk remata, Savarika nafatin iha oin ho skor 21:19.
Durante deskansa, treinadór husi ekipa rua fó orientasaun no motivasaun ba sira nia jogador, ho objetivu atu hadi’a estratéjia no aumenta produtividade iha parte segundu.
Tama ba parte segundu, jogadór husi ekipa rua kontinua halo ataka no resposta malu. Salazar komesa aumenta intensidade no konsege muda situasaun jogu. To’o deskansa dahuluk iha parte segundu, Salazar lidera ho skor 35:32.
Iha sesaun ikus parte segundu, kompetisaun sai maka’as liután. Pontu kontinua aumenta no ekipa rua la hakarak entrega jogu. To’o tempu regulár remata, Salazar no Savarika empate ho skor 49:49.
Tanba pontu empate, árbitru deside aumenta minutu lima atu ekipa rua disputa tempu extra. Iha tempu extra ne’e, Salazar konsege uza oportunidade sira ho di’ak liu no hatama pontu importante.
To’o minutu lima remata, Salazar sai manan nain hasoru Savarika ho skor 57:52, iha jogu ne’ebé lao ho kompetisaun maka’as to’o tempu ikus.
Jogu ida-ne’e mos hetan animasaun maka’as husi apoiantes ekipa rua. Sira kontinua hakilar no fó motivasaun, liuliu bainhira jogadór sira konsege hatama pontu importante.
(leo)
