DILI, STLTIMORLESTE.com – Sua Eminénsia Dom Virgílio Cardeal do Carmo da Silva SDB hato’o agradesimentu ba transladasaun restus mortais preladu na’in-tolu mai Timor-Leste.
Cardeal Virgílio hato’o agradesimentu ba Governu Timor-Leste, Igreja Katólika no entidade hotu ne’ebé envolve iha prosesu transladasaun restus mortais Dom Jaime Garcia Goulart, Dom José Joaquim Ribeiro no Monseñor Martinho da Costa Lopes liu husi ninia diskursu hafoin halao misa agradesimentu iha Fatin istoriku Tasi Tolu Dili, Tersa (01/09/2026).
Nia dehan, restus mortais preladu na’in-tolu ne’e fila mai Timor-Leste nu’udar forma ida atu fó onra no rekonhese sira-nia servisu pastorál, kontribuisaun espirituál no legadu ba Igreja no povu Timor-Leste.
Governu no Conferénsia Episcopál Timorense organiza programa serimónia ofisiál durante fulan Setembru 2026, inklui simu restus mortais iha Díli no serimónia homenagem iha Tasi Tolu.
Dom Jaime Garcia Goulart, Dom José Joaquim Ribeiro no Monseñor Martinho da Costa Lopes konsidera nu’udar figura importante iha istória Igreja Katólika iha Timor-Leste, ho sira-nia servisu pastorál durante períodu diferente iha istória nasaun.
Iha oportunidade hanesan, Prezidente Autoridade RAEOA, Regio da Cruz Salu, apresia Bispu na’in-tolu nu’udar patrimóniu Timor oan nian ne’ebé kontribui ba luta libertasaun nasional.
Regio da Cruz Salu hato’o apresiasaun ba transladasaun mortais Bispu na’in-tolu ne’ebé ohin to’o ona Timor-Leste, no konsidera sira nu’udar riku-soin istóriku ba povu Timor-Leste.
Nia hateten katak, kontribuisaun no dedikasaun Bispu na’in-tolu iha tempu pasadu iha prosesu luta libertasaun nasional Timor-Leste, to’o Timor Leste hetan ukun-rasik-an, tenke hetan apresiasaun no rekonesimentu husi jerasaun bá jerasaun iha Timor Leste.
“ita Nia Bispu sira ne’e nu’udar riku-soin Timor oan nian, tanba sira nia dedikasaun no kontribuisaun iha tempu luta libertasaun nasional Timor-Leste, to’o hetan ukun-rasik-an,” dehan Regio da Cruz Salu hafoin partisipa misa iha Tasi Tolu Dili.
Nia subliña katak Timor-Leste ohin sai ona nasaun independente, tanba ne’e Bispu sira ne’ebé nia mortais fila mai rai Timor-Leste merese atu hamutuk ho povu, hodi fó onra no glória ba sira.
PA-RAEOA konsidera transladasaun mortais Bispu na’in-tolu nu’udar momentu istóriku ida, ne’ebé fó oportunidade ba povu Timor-Leste atu lembra no fó valor ba kontribuisaun lider relijiozu sira iha istória luta nasional.
Iha oportunidade nee
Antonio Aitahan Matak mos hato’o agradesimentu ba IX Governu Konstitusional nia esforsu ho Igreja Katolika lori restu mortais Bispu nain-tolu mai Timor-Leste.
António Aitahan Matak hato’o apresiasaun ba IX Governu Konstitusional tanba esforsu hamutuk ho Igreja Katolika atu fasilita transladasaun restu mortais Bispu nain-tolu, ne’ebé ohin to’o ona iha Timor-Leste.
Nia hateten katak inisiativa ida-ne’e importante tebes ba povu Timor-Leste, liuliu atu fó onra no rekonhesimentu ba Bispu nain-tolu ne’ebé iha kontribuisaun boot ba nasaun iha tempu luta ba libertasaun nasional.
Aitahan Matak mos hato’o agradesimentu ba Igreja Katolika no entidade hotu ne’ebé envolve iha prosesu transladasaun, tanba kooperasaun ne’ebé permite restu mortais Bispu nain-tolu fila fali mai rai Timor-Leste.
(jos)
