MANATUTO, STLTIMORLESTE.com — Familia no komunidade Laleia prepara ona rezidensia atu simu restu mortál Monsenhor Martinho da Costa Lopes.
Familia Saudozu Monsenhor Martinho da Costa Lopes hein iha rezidensia Laleia, Manatuto, atu simu restu mortál husi Dili, Kuarta dader (02/09/2026).
Observasaun STL iha fatin hatudu preparasaun familia no komunidade Laleia, husi Ponte Manatuto to’o rezidensia.
Preparasaun inklui fatin toba ba restu mortál, reza, no misa iha Igreja Parokial Laleia.
Komunidade Laleia, Costantino Ximenes dehan, nia sente triste no kontente bainhira simu restu mortál Monsenhor Martinho.
“Ita triste tanba simu ema ne’ebé ita hadomi, maibé kontente tanba nia fila ba nia fatin moris,” komunidade Laleia, Costantino Ximenes ba STL iha Laleia, Kuarta (02/09/2026).
Tuir programa serimonia, restu mortál sei lori husi Laleia ba Igreja Parokia Manatuto.
Iha dalan, Governu sei muda naran Ponte Manatuto ba “Ponte Mons. Martinho da Costa Lopes”.
Husi Manatuto, restu mortál sei kontinua ba Dili no sei tau hamutuk ho restu mortál Saudozu Dom Alberto Ricardo da Silva.
Restu mortál sira sei tau iha Katedrál Dili, hanesan parte husi serimonia homenajen ba lider Igreja sira.
Governu mós sei inaugura Monumentu no Jardim Homenajen iha Tasi Tolu.
Aleinde monumentu iha Tasi Tolu, Governu sei konstrui monumentu ida ba Dom Martinho iha Mehara, Tutuala, Lautém.
Tema homenajen tinan ida-ne’e mak “Retratu Fé nian no Memoria Eterna ba Igreja no Timor-Leste”.
(jen)
