DILI, STLTIMORLESTE.com – Sidadaun sira ne’ebé lor-loron uza dalan iha Dili laran preokupa ho kondisaun semaforu (lampu merah) ne’ebé mate no tinta zebra cross ne’ebé la moos ona.
Tuir observasaun jornalista STL iha terrenu, Tersa (02/09/2026) haree, semaforu iha kruzamentu balun iha Dili laran la funsiona.
Iha fatin hanesan, lampu merah, kinur no matak mate hotu, laiha sinál ruma ne’ebé lakan.
Kondisaun ne’e halo motorista sira konfuzaun no halai arbiru de’it iha kruzamentu.
Aleinde ne’e, marka zebra cross iha dalan boot balun kuaze lakon no la moos ona.
Tinta ne’ebé uluk mutin moos agora mihis ona, difikulta ba ema la’o ain sira atu hakat dalan no fó risku boot ba asidente tránzitu.
Sidadaun José de Oliveira, hatete katak kondisaun ne’e fó ameasa ba seguransa utilizador dalan sira.
“Lampu merah mate kleur ona, karreta no motor halai arbiru de’it tanba laiha orientasaun,” dehan José ba STL, iha Dili, Tersa nee (3/9/2026).
Nia hatutan tan, kondisaun zebra ne’ebé mihis ona, halo ema sente la seguru bainhira hakat dalan.”Tinta la haree ona, ne’e perigu. Governu tenke tau atensaun lalais,” tenik nia.
Iha parte ketak, estudante Alarico Soares, hatete katak kondisaun ne’e difikulta estudante sira atu ba eskola.
“Ami hakat dalan tauk tanba zebra cross la moos ona, karreta sira la respeita,” dehan Alarico.
Estudante ne’e husu ba DNTT no autoridade kompetente, atu halo manutensaun lalais ba semaforu no pinta fali zebra cross sira, atu garante seguransa ba ema hotu.
(car)
