DILI, STLTIMORLESTE.com – Eskola Sekundáriu Jerál FINANTIL forma ona ekipa ida hodi prepara estudantes sira ba Ezame Nasional, ne’ebé tuir planu sei hala’o iha loron 19 fulan Outubru 2026.
Diretor Eskola Sekundáriu Jerál FINANTIL, Aniceto Berlelo hato’o informasaun ne’e ba STL iha nia servisu fatin Aimutin, Kuarta (02/09/2026).
Nia hatete katak, preparasaun ba Ezame Nasional lao tuir kalendáriu no oráriu ensinu-aprendizajen ne’ebé eskola prepara ona. Atividade aprendizajen iha kada disiplina kontinua lao normal, ho profesores sira ativu iha sala aula.
“Liga ba preparasaun ami nian ba Ezame Nasional, agora dadaun atividade ensinu-aprendizajen kada disiplina ida-idak lao normal hanesan bai-bain. Tanba tuir planu Ezame Nasional sei hala’o iha loron 19 fulan Outubru tinan ida ne’e, ami forma ona ekipa ida ba preparasaun,” nia esplika.
Aniceto Berlelo mós hatete katak, eskola ida-idak forma ekipa ida hodi responsabiliza ba preparasaun Ezame Nasional. Enkuantu mekanizmu no atividade preparasaun nian, ekipa ne’e sei esplika no organiza tuir nesesidade.
“Ita nia Ezame Nasional tuir planu sei hala’o iha loron 19 fulan oin. Ba preparasaun ida ne’e, ami nia ekipa forma tiha ona. Ami nia aprendizajen lao tuir kalendáriu ne’ebé iha, professores hanorin tuir planu no oráriu hanorin ne’ebé prepara ona,” katak nia.
Iha parte seluk, Diretor Eskola Sekundáriu Jerál 10 de Dezembru Comoro, Manuel Verdial, hatete katak preparasaun ba Ezame Nasional depende mós ba ativu no dedikasaun professores sira nian iha prosesu ensinu-aprendizajen kada loron.
“Hau hanoin liga ba ita nia atividade Ezame Nasional, preparasaun husi parte eskola nian mak oinsá profesores sira ativu kada loron hodi hala’o ensinu-aprendizajen ba estudantes sira, tanba iha tempu badak nia laran estudantes sira sei partisipa iha Ezame Nasional,” nia akresenta.
Manuel Verdial hatete katak, hanesan direitor, nia kontinua fó orientasaun ba estudantes sira atu mai tuir aula ho máxima, hodi bele prepara an diak liután ba Ezame Nasional.
Entretantu, Julio de Jesus, estudante husi Eskola Sekundáriu Jerál Finantil, hatete katak estudantes sira tenke aproveita tempu ne’ebé iha hodi prepara an ba Ezame Nasional.
“Los duni katak, iha fulan Outubru tinan ne’e ami sei tuir Ezame Nasional. Entaun agora dadaun labele falta eskola, kada loron tenke ativu iha aprendizajen husi professores sira, tanba ami nia professores sira ativu kada loron,” nia dehan.
(jac)
