DILI, STLTIMORLESTE.com – Instituto Ciências da Saúde (ICS) sei sosa tan ekipamentus prátika, liuliu ba Departamentu Farmásia, atu fasilita atividade prátika estudante sira nian.
Lia hirak ne’e hato’o husi Reitór ICS, Leão Borges ba STL iha nia knaar fatin, Kuarta (02/09/2026).
“Konaba ami-nia ekipamentus prátika nian, naton ona. Maibé ba oin ami atu sosa tan ekipamentus ba ita-nia estudante sira, liuliu ekipamentus ba Departamentu Farmásia, tanba ekipamentus ba departamentu lima ne’e sufisiente ona. Ekipamentus ne’ebé atu sosa ne’e ba laboratóriu, atu estudantes sira bele halo prátika no aprende deteta aimoruk,” katak nia.
Leão Borges hateten katak, durante ne’e estudante sira uza ekipamentus ne’ebé iha ona atu hala’o atividade prátika, tanba estudante sira ne’ebé estuda iha área saúde la’ós simu teoria de’it, maibé presiza hala’o mos prátika.
“Ami-nia ekipamentus prátika iha ona, maibé ba oin ami hakarak aumenta tan, hodi bele fasilita atividade prátika estudante sira nian. Depois de simu teoria, sira mos presiza halo prátika,” nia dehan.
Nia hatutan katak, ekipamentus iha laboratóriu prátika ba departamentu enfermagem, parteira, nutrisaun, farmásia no laboratóriu, inklui área ciénsia biomédika laboratorial, konsidera sufisiente hela. Sala prátika ba estudante sira mos diak, tanba departamentu lima ne’e iha sala prátika ketak-ketak.
“Kona-ba estudantes sira hala’o prátika, depende ba oráriu. Tanba iha oráriu prátika, ita-nia estudante sira tenke halo duni prátika. Teoria nian estudantes hotu simu ona, depois mak hala’o prátika. Nee ba departamentu lima ne’ebé agora daudaun eziste iha ICS,” nia informa.
Leão Borges husu estudante sira atu uza oportunidade ne’ebé iha ho diak, liuliu iha atividade teoria no prátika, atu bainhira remata estudu sira bele aplika koñesimentu no abilidade iha fatin servisu.
“Nune’e bainhira remata estudu, bele aplika iha fatin ne’ebé sira hetan servisu. Nee presiza aplika ho diak, tanba sira simu ona teoria no hala’o mos prátika iha área ne’ebé sira hili,” nia dehan.
Nune’e mos, Reitór ICS, Sebastião Pereira, dehan katak instituisaun iha laboratóriu no ekipamentus ba estudante sira iha área saúde, hanesan enfermagem no parteira, atu sira bele kontinua hala’o prátika depois de simu teoria.
“Ami iha laboratóriu no ekipamentus ba estudantes iha área saúde, hanesan enfermagem no parteira. Sira nafatin hala’o sira-nia prátika bainhira simu teoria, nune’e mos hala’o kedas prátika,” nia informa.
Enkuantu, Direitór Ezekutivu TLCE, José Monteiro, afirma katak instituisaun ensinu superior sira presiza kria kondisaun no prepara fasilidade adekuada ba estudante sira, atu bele partisipa iha atividade prátika no prosesu ensinu-aprendizajen ho diak.
(jac)
