BAUCAU, STLTIMORLESTE.com – Família Vulnerável iha Aldeia Uai-Tunau, Suku Uma Ana Iku, Postu Administrativu Venilale, Munisípiu Baucau, hein Prezidente Repúblika (PR) nia kompromisu.
Xefe Suku Uma Ana Iku, Antoninho da Costa Freitas, iha fulan Maiu 2026 Asesor Prinsipal Prezidente Repúblika ho ekipa vizita urujente ba família vuneravel idozu António Mira Belo ho nia oan Felisberta Pereira Belo no idoza Maria Baptista Guterres ho nia alin, Alcina Ximenes de Sousa ne’ebé hela uma kondisaun aat.
Husi vizita ne’e Asesor Prinsipal orienta Autoridade Suku Uma Ana Iku atu aprezenta proposta urjente ba Prezidente Repúblika (PR) José Ramos Horta, atu konstrui uma dignu ba família vulnerável refere, nune’e Autoridade Suku submete kedas proposta iha fulan Maiu 2026, maibé to’o ohin loron seidauk iha resposta.
“Sentimentu Autoridade nian, ita sente triste, tanba mai ho urjénsia, obriga ita lori tiha proposta, maibé to’o agora seidauk,” hateten Xefe Suku ne’e ba STL iha Vila Antiga Baucau, Segunda (07/09/2026).
Tuir istória família, idozu António Mira Belo, idade liu 80, ho nia oan feto, Felisberta Pereira Belo, durante tinan naruk hela iha uma ho kondisaun aat. Uma refere taka deit ho nuu tahan, ne’ebé agora dodok ona.
Bainhira udan iha tempu kalan, António Mira Belo ho nia oan dala barak tenke toba iha udan laran. Maibé, agora família ne’e hetan ona uma temporária ida husi ekipa FURAK, ne’ebé lideradu husi Rio Soares.
Enkuantu, idoza Maria Baptista Guterres agora iha idade 76 tinan no sofre ho defisiénsia iha ain. Nia hela hamutuk ho nia alin, Alcina Ximenes de Sousa, idade 57 tinan, ne’ebé sofre ho defisiénsia iha liman parte loos.
Maria Baptista Guterres iha uluk laen no oan mane ida, maibé nia laen fila ona ba Aman Maromak, kanudan Santo, no husik hela nia mesak ho nia família.
Nia feto-foun no bei-oan sira agora hela ketak. Tanba ne’e, Maria Baptista Guterres ho nia alin Alcina Ximenes de Sousa, ne’ebé la iha laen kaben no oan, hela hamutuk iha uma ki’ik ida.
Uma refere kompostu kuartu toba fatin ida, sala ida no varanda, ne’ebé konstrui uluk husi joven sira iha bairru laran.
Kondisaun uma ne’e agora aat liután, tanba kalen ne’ebé taka uma nian la prega ho pregu, maibé tahan deit ho au. Gravat no estrutura uma nian ne’ebé uza au mos komesa dodok.
Kondisaun uma ne’e fó impaktu diretamente ba deskansa Maria no Alcina iha tempu kalan. Bainhira udan no anin boot akontese, liuliu iha kalan, sira nain rua tenke hader husi toba fatin tanba ta’ak no udan tama ba uma laran.
“Ami konfirma katak sira dehan ema barak, maibé ita husu atu aselera lalais. Tenke urjente. Hau sei tun konfirma,” nia konklui.
(tom)
