DILI, STLTIMORLESTE.com – Maske eleisaun Prezidente Republika sei akontese iha 2027, maibe figura balu ne’ebe hakarak kandidata aan komesa halo movimentu sedu hodi faan oin iha media sosial (MedSos) no halo konsolidasaun iha baze, ho objetivu buka popularidade duke hatudu integridade no vizaun estadu.
Kona-ba kestaun ne’e, Martinho Sarmento hatete ba STL, iha Dili, Segunda nee (07/09/2026), katak figura balu ne’ebe hakarak kandidata aan ba PR agora komesa halo kampania informal, uza facebook, tiktok no enkontru kiik iha baze.
“Ami akompanha iha media sosial, kandidatu balu komesa faan oin, halo video, halo slogan ne’ebe diak rona, maibe laiha substansia estadu. Ida ne’e hatudu katak sira buka popularidade deit, la’os hatudu integridade no vizaun,” dehan Martinho ho kritiku.
Tuir nia, ema ne’ebe hakarak sai PR tenke hatudu uluk nia lalaok moris, nia honestidade no nia komprensaun ba konstituisaun.
“Prezidente Republika la’os artista, la’os influenser. PR ne’e aman ba nasaun, tenke iha integridade moral, esperiensia no hatene saida mak knaar konstitusional. Se mai deit ho video tik-tok, ida ne’e la to’o,” nia hatete.
Popularidade tuir Martinho bele sosa ho osan no media, maibe integridade tenke hatudu ho tempu naruk.
“Popularidade bele harii iha fulan ida, maibe integridade harii iha tinan barak. Povu Timor tenke haree didiak, se kandidatu ne’e ema diak ka lae, iha istoria diak ka lae, iha kontribuisaun ba nasaun ka lae, la’os haree deit nia oin iha facebook,” nia esplika.
Nia husu ba povu, atu labele fasil fiar ba kandidatu ne’ebe mosu sedu ho promesa midar.
“Povu labele monu ba promesa. Tenke husu, saida mak nia halo ona ba nasaun? Saida mak nia vizaun ba paz no estabilidade? Se la iha ida ne’e, popularidade deit la to’o atu kaer funsaun boot hanesan Prezidente Republika,” Martinho konklui.
Iha parte ketak Akademista UNTL, Ancelmo de Araujo hatete katak kandidatu PR 2027 ne’ebe mosu sedu ne’e hatudu sinál demokrasia moris, maibe presiza kuidadu atu labele hamosu polarizasaun sedu.
“Kandidatu barak mosu ne’e diak ba demokrasia, hatudu ema hotu iha direitu, maibe labele halo politika fahe malu. Tenke iha etika, labele hatun malu iha media sosial. Kandidatu PR tenke hatudu maturidade politika hodi eduka povu, la’os provoka povu,” dehan Ancelmo.
Ancelmo hatutan katak, kandidatu PR la bele depende deit ba viral iha media sosial, maibe tenke iha preparasaun intelektual no moral atu kaer responsabilidade boot hanesan Xefe Estadu no Simbolu unidade nasional nian.
Entretantu kandidatu PR sira komesa deklara aan ona ba publiku no halo konsolidasaun ho komunidade sira iha baze, hafoin ne’e posting imajen no video ba publiku hodi halo komentariu, hodi buka atensaun no hatudu sira nia prezensa molok tama ba periodu kampania ofisial. Maske seidauk iha deklarasaun ofisial husi Tribunal, maibe movimentu sira ne’e hatudu katak kompetisaun ba 2027 komesa manas ona iha media sosial.
(car)
