MAUBISSE, STLTIMORLESTE.com — Konsellu Imprensa (KI) realiza formasaun kona-ba hakerek Feature News ba jornalista na’in 16 iha Munisípiu Ainaro, ho objetivu atu hasa’e kapasidade jornalista, liuliu repórter sira, iha área Feature Writing no Feature Reporting.
Formasaun ne’e realiza iha Salaun Sara, Postu Administrativu Maubisse, Munisípiu Ainaro, Segunda (07/09/2026), no partisipa husi jornalista sira husi Suara Timor Lorosa’e (STL), RTTL, Rádio Liberdade, rádio komunitária sira husi munisípiu no nasionál, TVE, Rádio Loriko no meiu-komunikasaun sira seluk.
Diretór Analiza no Dezenvolvimentu Media husi Konsellu Imprensa, Alverico da Costa Júnior, hatete iha formasaun ne’e katak Feature Writing iha rádio no televizaun tenke komprimidu ba verdade, maibé mos bele hasa’e interese umanu iha jornalizmu transmisaun.
Nia hatete, formasaun ne’e sai ona formasaun dala hitu, depois formasaun dahuluk realiza iha Abril, no atividade ne’e parte husi esforsu KI atu hasa’e kapasidade jornalista sira iha área Feature News, liuliu ba jornalista televizaun no rádio.
“Ida nee ho objetivu atu kapasita ita nia jornalista sira, liuliu repórter sira iha rádio, televizaun. Maski antes ne’e kolega sira hakerek ona Feature News, maibé ba ida ne’e hau hanoin oinsá atu hakle’an liután buat ne’ebé antes ne’e sira pratika ona. Ida ne’e mak Konsellu Imprensa halo bazeia ba planu ne’ebé ita iha tiha ona,” dehan Alverico.
Alverico mos hatete katak, iha ona mensajen forte husi Primeiru-Ministru Kay Rala Xanana Gusmão kona-ba nesesidade jornalista sira atu hakle’an liután sira nia koñesimentu iha jornalizmu, liuliu iha Feature Reporting no área jornalizmu espesializada sira seluk.
Tuir nia, matéria jornalístika la bele foka de’it ba polítika no asuntu ekonómiku, maibé tenke fó mos atensaun ba asuntu sosiál sira, liuliu istória ne’ebé iha interese umanu.
Nia hatete, formasaun orsamentu apoiu husi Governu, no kada tinan Konsellu Imprensa preve hela maibe dala ruma formasaun ida rua deit maibe tanba kestaun ejijensia Primeiru Ministrun nia katak media sira dala barak hatoo deit news babain lahalo investigasaun no imformasaun la detailu ho ida nee mak Primeiru Ministru preve orsamentu rihun atus rua dolar amerikanu ba KI para fo formasaun ba jornalista sira.
Alverico hatete, Primeiru-Ministru Xanana Gusmão mós hato’o preokupasaun katak mídia dala barak foka liu ba news baibain, sem halo investigasaun kle’an no aprezenta informasaun ho detallu.
“Ita espera kolega sira ho konstrusaun di’ak, fokus atu maizumenus bele hetan buat ne’ebé formador sira hato’o ne’e. Buat ne’ebé ami iha Konsellu Imprensa hakarak mak jornalista sira bele hetan redasaun no apoiu, atu sira bele implementa iha mídia ida-idak. Se la implementa, ne’e mak sai hanesan problema. Ida ne’e mak buat ne’ebé importante liu,” dehan nia.
Iha sorin seluk, formador husi Indonézia, La Rane Hafied, esplika diferensa entre Notísia Normal ka Straight News ho Feature Writing.
Nia hatete Straight News mak matéria jornalístika ne’ebé fó informasaun importante ho lalais no direta, enkuantu Feature Writing konta istória ho kle’an liután, liuliu kona-ba ema, esperiénsia, problema sosiál, kultura, saúde, edukasaun, ambiente no tema sira ne’ebé iha Human Interest.
“Straight News nee hetan informasaun ne’ebé lais no publika lais, maski seidauk kompletu. Maibé hakerek Feature sei akumula hotu dadus ka informasaun, nune’e konta fali istória kompletu no diferente. Mak lais no hein ne’e, maibé hotu-hotu tenke mai ho dadus kompletu,” dehan La Rane.
Partisipante formasaun, Arminda Carvalho husi RTTL hato’o agradese ba Konsellu Imprensa tanba fasilita formasaun ne’e, ne’ebé konsidera bele aumenta koñesimentu jornalista sira kona-ba oinsá hakerek Feature News.
“Agradese ba Konsellu Imprensa ne’ebé fasilita tan formasaun ba jornalista sira hodi hakle’an sira nia koñesimentu iha área jornalizmu. Liuhusi formasaun ne’ebé fasilita husi KI, hau iha esperansa katak sei aumenta tan hau nia koñesimentu jornalista, liuliu iha hakerek Feature. Agradese tebes ba KI ne’ebé fasilita ona formasaun oioin ba jornalista sira, nune’e bele aumenta tan jornalista sira nia koñesimentu,” dehan Arminda.
Formasaun ne’e fasilita husi treinadór na’in rua husi Indonézia, Firmansyah Syamsi no La Rane Hafied, ne’ebé fó matéria no orientasaun ba jornalista sira kona-ba prinsipiu, estrutura no pratika hakerek Feature News ba rádio no televizaun.
(eme)
