DILI, STLTIMORLESTE.com – Prezidente Repúblika (PR), José Ramos-Horta anunsia vizita istórika Primeiru-Ministru na’in-haat husi nasaun Pasífiku ba Timor-Leste, iha loron 28 Novembru 2026.
Xefe Estadu hato’o informasaun ne’e iha jantar konfraternizasaun, nu’udar parte Enkontru ba Dala-41 Governadór Banku Sentrál Pasífiku Súl nian, ne’ebé hala’o iha Palm Spring Hotel, Dili, Sábadu, 10/10/2026.
Líder sira ne’ebé sei mai inklui primeiru-ministru husi Papua-Nova Guiné, Vanuatu, Ilhas Salomão no Fiji, atu hala’o vizita konjunta ne’ebé konsidera istórika ba Timor-Leste.
Iha ninia diskursu ba governadór banku sentrál rejionál sira, Prezidente Ramos-Horta enfatiza abut linguístiku, kulturál no istóriku ne’ebé liga Sudeste Aziátiku ho Pasífiku.
Nia mós destaca importánsia reziliénsia no solidariedade ne’ebé hametin relasaun entre nasaun sira iha rejiaun ne’e.
Sentru diplomátiku konjuntu
Atu hametin integrasaun Timor-Leste iha komunidade Pasífiku, Prezidente Ramos-Horta fahe inisiativa governu nian atu harii sentru diplomátiku konjuntu ida, ne’ebé hetan apoiu husi Primeiru-Ministru Kay Rala Xanana Gusmão.
Tuir Prezidente, Estadu daudaun ne’e negosiasaun hela atu hetan edifísiu komersiál modernu ida iha Dili, ne’ebé konstrui ho rezisténsia ba rai-nakdoko.
Planu ne’e inklui disponibiliza andár ida tomak gratuitamente ba nasaun Ilhas Pasífiku sira ne’ebé hakarak estabelese embaixada iha Timor-Leste.
Inisiativa ne’e espera bele fasilita nasaun Pasífiku sira atu estabelese reprezentasaun diplomátika iha Dili, no hametin kooperasaun entre nasaun viziñu sira.
Iha parte seluk, Timor-Leste mós sei loke embaixada iha Port Moresby, Papua-Nova Guiné, nu’udar pasu ida atu haforsa relasaun bilaterál.
Prezidente hein katak Fiji no Vanuatu mós bele tuir inisiativa ne’e, hodi aumenta kooperasaun no integrasaun rejionál.
Timor-Leste prontu simu líder Pasífiku
Prezidente Ramos-Horta destaca Timor-Leste nia pozisaun nu’udar nasaun seguru iha Sudeste Aziátiku no fó garantia katak líder sira ne’ebé sei vizita sei simu ho laran-metin no hospitalidade husi povu Timoroan.
Nia refere mós ba seguransa iha Palásiu Prezidensiál, ne’ebé la depende ba utilizasaun kilat, nu’udar parte husi Timor-Leste nia ambiente seguru.
Aleinde ne’e, labarik sira ne’ebé halibur iha dalan-ninin atu simu líder estranjeiru sira hatudu kultura acolhimentu no sentimentu amizade ne’ebé povu Timoroan iha ba vizitante.
Prezidente subliña katak Timor-Leste prontu atu simu no hametin relasaun ho ninia nasaun viziñu sira iha Pasífiku, liuhusi diplomásia, solidariedade no kooperasaun rejionál.
(eme)
