DILI, STLTIMORLESTE.com – Husi konkorente 32 ba vaga Juiz Konselleiru Supremu Tribunál Justisa (STJ), na’in-21 pasa ezame eskrita, enkuantu na’in-11 la pasa.
Rezultadu ezame eskrita ne’e publika ona iha Sentru Formasaun Jurídika no Judisiária (SFJJ). Konkorente sira ne’ebé pasa sei kontinua ba faze entrevista, enkuantu sira ne’ebé la pasa bele hato’o reklamasaun.
Komisária Rekrutamentu Vaga Juiz STJ, Carmelita Moniz hato’o informasaun ne’e ba jornalista sira iha Mandarin, Tersa-feira (13/10/2026).
Carmelita esplika katak, husi konkorente 32 ne’ebé partisipa iha konkursu, na’in-25 mak juíz, na’in-tolu husi Ministériu Públiku no na’in-haat jurista ne’ebé rekoñese sira-nia méritu.
Husi juíz na’in-25, na’in-17 pasa ba entrevista no na’in-8 la pasa. Husi Ministériu Públiku, na’in-ida pasa no na’in-rua la pasa.
Enkuantu husi jurista na’in-haat, na’in-tolu pasa ba faze entrevista no na’in-ida la pasa.
Carmelita subliña katak, rezultadu ezame eskrita ne’e seidauk sai rezultadu final, tanba konkorente sira sei enfrenta faze entrevista atu disputa vaga neen Juiz Konselleiru iha STJ.
Prosesu selesaun ne’e hala’o tuir prosedimentu no desizaun Konsellu Superior Majistratura Judisiál (KSMJ).
Nia afirma katak, juri sira hala’o avaliasaun ho profesionalizmu, integridade no imparsiálidade, atu garante prosesu rekrutamentu ne’ebé transparente no independente.
Durante koreksaun ezame eskrita, juri sira uza númeru no kódigu kandidatu nian, la’ós naran, atu asegura imparsiálidade iha prosesu avaliasaun.
Tuir nia, juri sira foin hatene identidade kandidatu sira depois prosesu koreksaun ezame eskrita remata.
Carmelita mós hato’o parabéns ba konkorente sira ne’ebé pasa no agradese juri sira-nia servisu. Nia husu kandidatu sira atu prepara an di’ak ba entrevista.
Iha fatin hanesan, Komisáriu Rekrutamentu Vaga Juiz STJ, José Pedro Camões, afirma katak konkorente sira ne’ebé la pasa iha direitu atu hato’o reklamasaun durante loron 15.
“Konkorente sira ne’ebé la pasa iha prazu loron 15 atu hato’o reklamasaun diretamente ba juri, ne’ebé sei avalia no foti desizaun,” nia dehan.
José Pedro esplika katak, juri sira iha prazu loron 10 atu avalia reklamasaun sira no foti desizaun, molok publika fali rezultadu.
“Juri sira iha prazu loron 10 atu avalia reklamasaun. Se prosesu remata sedu, rezultadu bele publika molok prazu ne’e,” nia hatutan.
Nia informa katak rezultadu ezame eskrita haruka diretamente ba konkorente sira-nia email no publika mós iha SFJJ.
José Pedro subliña katak, konkorente sira ne’ebé la pasa bele hato’o reklamasaun ho fundamentu forte, atu juri sira bele halo avaliasaun tuir prosedimentu.
Nia hateten katak, konkorente sira ne’ebé la hato’o reklamasaun durante prazu ne’ebé determina sei la kontinua ba faze entrevista.
Nia mós hato’o parabéns ba majistradu sira ne’ebé pasa ba etapa tuirmai no agradese juri sira-nia kontribuisaun durante prosesu rekrutamentu.
Prosesu rekrutamentu ba vaga neen Juiz Konselleiru STJ sei kontinua ho avaliasaun reklamasaun no faze entrevista, molok determina rezultadu final tuir regra ne’ebé aplika.
(ter)
