DILI, STLTIMORLESTE.com — Jurista Sérgio Dias Quintas husu Komisaun Rekrutamentu publika valor ezame eskrita kandidatu vaga Juiz Konselleiru Supremu Tribunál Justisa (STJ), atu garante transparénsia.
Sérgio hato’o preokupasaun ne’e ba jornalista sira iha Kaikoli, tersa-feira (13/10/2026), depoisde haree lista rezultadu ezame eskrita ne’ebé publika iha kuadru avizu Sentru Formasaun Jurídika no Judisiária (SFJJ).
Nia esplika katak, lista ne’ebé publika hatudu de’it naran kandidatu sira ne’ebé pasa no la pasa, maibé la inklui valor ezame ne’ebé kandidatu ida-idak hetan.
“Publikasaun rezultadu ezame la bele hatudu naran de’it, maibé tenke inklui mós valor atu públiku bele hatene kandidatu sira-nia kapasidade,” Sérgio dehan.
Tuir nia, publikasaun valor ezame importante atu permite sosiedade komprende kandidatu ida-idak nia rezultadu no kapasidade iha matéria ne’ebé avalia durante prosesu selesaun.
Nia konsidera katak, publikasaun valor bele ajuda públiku kompara rezultadu kandidatu sira-nian no komprende razaun ne’ebé halo kandidatu balu pasa ba faze entrevista, enkuantu seluk la pasa.
“Bainhira ita la publika ema nia valor, ida-ne’e bele hamosu dúvida, tanba públiku la hatene rezultadu ne’ebé kandidatu ida-idak hetan,” nia esplika.
Sérgio afirma katak, transparénsia importante iha prosesu rekrutamentu ba kargu judisiáriu aas, liuliu atu evita dúvida iha sosiedade kona-ba rezultadu avaliasaun kandidatu sira-nian.
Nia defende katak, tanba konkursu ne’e loke ba públiku, Komisaun Rekrutamentu tenke konsidera publikasaun valor ezame, tuir regra no prosedimentu ne’ebé aplika.
Jurista ne’e mós lembra katak, iha prosesu formasaun uluk ba juíz, prokuradór no defensór iha SFJJ, instituisaun publika valor ezame kandidatu sira-nian.
Tanba ne’e, nia husu klarifikasaun kona-ba razaun ne’ebé halo valor ezame ba vaga Juiz Konselleiru STJ la publika hanesan prosesu rekrutamentu sira seluk.
Sérgio afirma katak, tuir nia komprensaun, nia la hatene regra ida ne’ebé bandu publikasaun valor ezame, nune’e kestaun ne’e presiza klarifikasaun.
Komisaun Defende Konfidensialidade Valor Ezame
Iha parte seluk, Komisária ba Rekrutamentu Vaga Juiz STJ, Carmelita Moniz, esplika katak Komisaun la publika valor ezame tanba tuir regra ne’ebé inklui iha regulamentu avaliasaun.
Carmelita afirma katak, valor ezame kandidatu sira-nian iha natureza konfidensiál, liuliu tanba rekrutamentu ne’e envolve kargu judisiáriu aas iha Supremu Tribunál Justisa.
Nia esplika katak, kandidatu sira mak juíz ho esperiénsia profisionál naruk, inklui balu ne’ebé servisu ona liu tinan 24 iha karrreira judisiária, desde tempu UNTAET.
Tuir nia, publikasaun valor ezame tenke konsidera natureza prosesu rekrutamentu no esperiénsia profisionál kandidatu sira-nian, tanba sira la’ós profisionál ne’ebé foin hahú karrreira.
Carmelita hatutan katak, juíz sira ne’ebé la pasa ba faze tuirmai sei kontinua hala’o sira-nia knaar iha pozisaun profisionál ne’ebé sira okupa atualmente.
Nia afirma katak, transparénsia prosesu rekrutamentu la depende de’it ba publikasaun valor ezame, maibé mós ba divulgasaun lista kandidatu sira ne’ebé pasa ba faze entrevista.
Komisária ne’e esplika, katak kandidatu sira hetan ona valor iha faze avaliasaun dokumentus, ne’ebé sai parte husi prosesu selesaun tuir kritériu estabelesidu.
Valor husi avaliasaun dokumentus, ezame eskrita no entrevista sei kombina tuir kritériu avaliasaun, atu determina klasifikasaun final kandidatu sira-nian.
Klasifikasaun final ne’e sei determina kandidatu sira ne’ebé okupa pozisaun primeiru, segundu, terseru no pozisaun sira seluk iha rezultadu konkursu.
Carmelita mós refere ba sistema avaliasaun karrreira juíz iha Konsellu Superior Majistratura Judisiál (KSMJ), ne’ebé uza klasifikasaun atu determina rezultadu avaliasaun majistradu sira-nian.
(ter)
