DILI, STLTIMORLESTE.com — Klubu voleibol mane Jolitomi vence Daçuate ho rezultadu 3–0 iha Liga Voleibol Timor-Leste Primeira Divizaun Époka 2026.
Partida ne’e hala’o iha Campo Voleibol Ginásio Dili, tersa-feira (13/10/2026), ho Jolitomi hatudu dominasaun durante set tolu.
Jolitomi garante vitória liuhusi rezultadu 25–13 iha set primeiru, 25–22 iha set daruak no 25–17 iha set datoluk.
Iha set primeiru, ekipa rua hahú partida ho intensidade aas. Maibé, Jolitomi konsege kontrola jogu liuhusi atake efetivu no defeza organizadu, hodi manan 25–13.
Tama ba set daruak, Daçuate tenta hadi’a nia dezempeñu no hamenus diferensa pontu, hodi fó rezisténsia maka’as ba Jolitomi.
Maski hasoru rezisténsia, Jolitomi kontinua hatudu konsisténsia iha smash, passing no bloku, hodi manan set daruak ho rezultadu 25–22 no lidera partida 2–0.
Iha set datoluk, Daçuate kontinua luta atu hamenus diferensa pontu, maibé Jolitomi mantein konsentrasaun no kontrola ritmu jogu.
Jolitomi finalmente taka set datoluk ho rezultadu 25–17, hodi asegura vitória jerál 3–0 kontra Daçuate.
Vitória ne’e hatudu Jolitomi nia kapasidade atu kompete iha Primeira Divizaun, liuliu iha koordenasaun entre jogadór, atake, servis no defeza.
Partida ne’e realiza iha loron daruak kompetisaun nian, depois Primeiru-Ministru Xanana Gusmão loke ofisialmente liga ne’e, Segunda-feira (12/10/2026).
Durante partida, adepta no apoiadór sira marka prezensa iha Ginásio Dili atu fó apoiu no motivasaun ba ekipa rua.
(leo)
