DILI, STLTIMORLESTE.com – Prezidente Repúblika (PR), José Ramos-Horta husu estudante sira ne’ebé tuir Ezame Nasionál atu estuda maka’as, tanba la estuda bele kauza reprova iha ezame.
Horta hato’o mensajen ne’e ba jornalista sira iha Palásiu Prezidensiál Nicolau Lobato, Bairru Pité, Dili, iha tersa-feira (13/10/2026). Nia subliña katak estudante sira tenke prepara an ho di’ak, tanba futuru nasaun nian iha juventude nia liman.
“Estudante sira tenke estuda atu tuir ezame. Se la estuda, bele lakon iha ezame. Tanba ne’e, estuda nafatin no la bele lakohi aprende,” dehan Prezidente Repúblika.
Prezidente Repúblika mós informa katak nia kontinua buka dalan hamutuk ho embaixada sira atu fó apoiu ba estudante no sidadaun Timoroan sira.
Horta temi ezemplu kona-ba esforsu atu ajuda sidadaun Timoroan ida hetan viza ba Estadus Unidus Ameriká, atu partisipa iha kompetisaun kona-ba intelijénsia artifisiál (AI), ne’ebé nia simu konvite atu partisipa.
Nia esplika katak kompetisaun ne’e envolve partisipante na’in 100 husi nasaun oioin, no Timoroan ne’e konsege hetan pozisaun dahuluk. Maibé, to’o agora, sidadaun ne’e seidauk hetan viza ba kompetisaun ne’e.
Prezidente Repúblika dehan katak nia ko’alia ona dala rua ho Embaixada Estadus Unidus Ameriká atu acelera prosesu viza, tanba prazu atu partisipa besik atu taka.
Iha nia mensajen ikus, Horta enfatiza katak estudante sira tenke estuda maka’as, tanba Timor-Leste presiza ema matenek no juventude ne’ebé bele kontribui ba dezenvolvimentu nasaun nian.
(eme)
