DILI, STLTIMORLESTE.com – Ministériu Edukasaun suspende atividade letiva prezensiál durante loron tolu, hahu hosi 15 to’o 17 Outubru 2026, tanba poluisaun ár kauza husi ahi-suar.
Suspensaun ne’e aplika ba estabelesimentu ensinu públiku, partikulár no kooperativa sira, hosi nível pré-eskolár, ensinu báziku, ensinu sekundáriu jerál to’o ensinu sekundáriu tékniku-vokasionál iha territóriu nasionál tomak.
Ministériu Edukasaun foti desizaun ne’e bazeia ba informasaun hosi Diresaun Nasionál Meteorolojia no Jeofízika kona-ba kualidade ár ne’ebé deteriora tanba kontaminasaun partíkula poluente hosi ahi-suar iha rejiaun ka nasaun viziñu.
Desizaun ne’e mosu tanba risku ba saúde públika, liuliu estudante, manorin no membru komunidade edukativa sira ne’ebé bele hetan impaktu hosi espozisaun ba partíkula poluente iha atmosfera.
Ministériu Edukasaun no Ministériu Administrasaun Estatal foti medida ne’e, konsidera mós preokupasaun Prezidente Repúblika, José Ramos-Horta, kona-ba impaktu ahi-suar ba saúde labarik no joven sira.
“Durante períodu suspensaun, bele foti modalidade alternativa sira ba akompañamentu pedagójiku, tuir orientasaun hosi servisu kompetente sira,” haktuir nota komunikadu imprensa Ministériu Edukasaun ne’ebé STL asesu iha kuarta-feira (14/10/2026).
Durante suspensaun, Ministériu Edukasaun rekomenda inan-aman sira atu limita labarik nia atividade iha li’ur, evita atividade fízika iha li’ur no uza máskara respiratória apropriada bainhira presiza sai hosi uma.
Ministériu ne’e mós husu família sira atu taka odamatan no janela bainhira konsentrasaun ahi-suar ka partíkula poluente aas, no evita sunu fo’er ka materiál seluk ne’ebé bele aumenta poluisaun atmosférika.
Diretór eskola sira tenke asegura katak informasaun kona-ba suspensaun ne’e to’o ba estudante, dosente, ajente la’ós dosente, inan-aman no komunidade edukativa hotu.
Ministériu Edukasaun determina mós atu loron 14 Outubru uza hodi prepara no orienta estudante sira atu kontinua aprende iha uma durante períodu suspensaun.
Dirijente eskola sira tenke asegura katak manorin fó servisu uma (TPC) ba estudante sira, atu prosesu aprendizajen bele kontinua maski atividade prezensiál suspende temporariamente.
Aleinde ne’e, estabelesimentu ensinu sira tenke prepara planu espesífiku atu rekupera atividade ensinu no aprendizajen ne’ebé la hala’o durante suspensaun. Rekuperasaun bele realiza liuhosi Grupu Traballu Profesores iha loron Sábadu, 17 Outubru.
Ministériu Edukasaun mós rekomenda ba eskola sira ne’ebé la tama iha rede oferta públika, inklui eskola internasionál, atu konsidera labarik sira-nia saúde no foti desizaun tuir orientasaun iha komunikadu imprensa ne’e.
(alb)
