DILI, STLTIMORLESTE.com – Segundo Komandante Jerál Polísia Nasionál Timor-Leste (PNTL), Komisáriu Asistente Polísia Natersia Eufrasia Soares Martins hatete katak, instituisaun forte presiza rekursu umanu, orsamentu no ekipamentu adekuadu.
Segundo Komandante Jerál PNTL, Komisáriu Asistente Polísia Natersia Eufrasia Soares Martin hatete, PNTL presiza avalia nia kapasidade institusionál, inklui rekursu umanu, lojístika, orsamentu, estrutura no kuadru legál.
“Haree ba mandatu ne’ebé kompleta ona fulan ne’en, ita halo esforsu atu identifika kapasidade PNTL, inklui rekursu umanu, lojístika, orsamentu, estrutura no lei, atu asegura harmonizasaun iha kumprimentu misaun,” hatete Segundo Komandante Jerál PNTL, Komisáriu Asistente Polísia Natersia Eufrasia Soares Martin ba jornalista sira iha CCD, Kuarta (14/10/2026).
Nia subliña katak, rekursu no ekipamentu adekuadu importante atu apoia pesoál polísia sira hala’o knaar ho efetivu, liuliu iha era teknolojia ne’ebé dezenvolve lalais.
Tuir nia, teknolojia hanesan intelijénsia artifisiál (AI) bele fó benefísiu ba servisu, maibé mós bele uza hodi komete krime no hamosu ameasa foun ba seguransa públika.
“Teknolojia kontinua dezenvolve lalais. AI bele ajuda buat di’ak, maibé mós bele uza hodi komete krime. Ita tenke prepara an atu enfrenta ameasa sira ne’e,” nia deklara.
Nia aumenta katak, Estadu presiza hanoin ba futuru no halo investimentu iha instituisaun seguransa, liuliu PNTL no Forsa Defeza, atu hametin kapasidade responde ba ameasa sira.
“Buat hirak ne’e depende ba kapasidade Estadu atu investe iha instituisaun sira, liuliu Polísia no Defeza, atu forte no firme hodi defende nasaun no garante seguransa komunidade,” nia deklara.
Iha fatin ketak, Akademista José Costantino Ximenes dehan, foin dadauniha Semináriu Nasionál, organiza husi Gabinete Igualdade Géneru PNTL, ho tema “Feto PNTL: Lideransa, Profisionalizmu no Futuru Instituisaun”. Tanba nee, parabens ba PNTL halaonona Seminariu Nasional.
“Ita hare’e partisipasaun polísia feto husi komandu PNTL munisípiu 13, inklui RAEOA no unidade UPM, UEP no UPF, tanba ne’e ita hare’e presiza rekursu forte hodi dezenvolve Instituisaun PNTL ne’e ba oin hodi futuru ne’ebe diak,” nia afirma.
(jen)
