DILI, STLTIMORLESTE.com – Konfederasaun Sindikatu Timor-Leste (KSTL) husu Governu atu aumenta saláriu mínimu hodi valoriza traballadór, hasa’e poder kompra no kombate pobreza.
Prezidente Konfederasaun Sindikatu Timor-Leste (KSTL), Almeiro Vila Nova, hato’o pedidu ne’e ba STL iha Bemori, Tersa-feira (13/10/2026).
Almeiro hateten katak traballadór sira ne’ebé simu US$ 115 kada fulan enfrenta difikuldade atu responde ba nesesidade bázika no sustenta família.
Nia konsidera saláriu mínimu nu’udar instrumentu importante atu garante remunerasaun digna, hametin koesaun sosiál no proteje traballadór ho rendimentu ki’ik.
“Ami lamenta tebes deklarasaun MKAE nian ne’ebé diferente ho informasaun anteriór kona-ba proposta saláriu mínimu,” dehan Almeiro.
Nia lamenta pozisaun Ministériu Koordenadór Asuntu Ekonomiku (MKAE) kona-ba prosesu aprezentasaun proposta saláriu mínimu ba Konsellu Ministru.
Almeiro konsidera katak pozisaun MKAE bele afeta prosesu revizaun saláriu mínimu ne’ebé Konsellu Nasionál Traballu (CNT) prepara ona.
Nia esplika katak, CNT kompostu husi reprezentante Governu, empregadór no traballadór, ne’ebé halo konsultasaun no prepara proposta aumentu saláriu mínimu.
Almeiro afirma katak, reprezentante parte tolu iha CNT konkorda ho proposta ne’ebé haruka ona ba MKAE, inklui reprezentante Governu liuhusi SEFOPE.
“Parte tolu ne’ebé reprezenta Governu, empregadór no traballadór iha CNT konkorda ho proposta saláriu mínimu ne’e,” nia afirma.
Nia husu MKAE atu respeita prosesu konsultasaun no konsidera proposta CNT, ne’ebé, tuir nia, bazeia ba Lei Nú. 4/2012, Artigu 7, no Dekretu Governu Nú. 7/2016.
Almeiro konsidera proposta ne’e moderada tanba buka ekilibra interese traballadór no empregadór, hodi garante remunerasaun justu.
Nia defende katak, revizaun saláriu mínimu tenke halo kada tinan, ho análize kle’an kona-ba impaktu ekonómiku no sosiál.
Almeiro afirma katak, Timor-Leste liu ona tinan 14 lahó ajustamentu saláriu mínimu, ne’ebé, tuir nia, afeta traballadór sira-nia poder kompra.
“Ajustamentu ne’e la’ós atu fó todan ba empregadór, maibé atu kompensa valór saláriu ne’ebé lakon durante tinan barak,” dehan Almeiro.
Nia refere ba peskiza Organizasaun Internasionál Traballu (ILO) iha períodu 2022–2023, ne’ebé, tuir nia, hatudu katak saláriu mínimu Timor-Leste nian ki’ik kompara ho nasaun seluk iha Ázia-Pasífiku.
Almeiro mós afirma katak, traballadór sira-nia poder kompra tun besik 12%, ne’ebé aumenta presaun ekonomia ba família sira.
Nia esplika katak, proposta revizaun saláriu mínimu ne’e aplika ba setór privadu, kooperativa no servisu públiku, maibé la’ós ba Orsamentu Jerál Estadu.
Almeiro hateten katak prosesu determina saláriu mínimu hahú iha períodu 2018–2019, liuhusi peskiza CNT iha munisípiu hotu-hotu.
Durante tinan ualu, CNT hala’o konsultasaun ho ministériu relevante, rona peritu sira-nia hanoin no konsidera rekomendasaun atu hadi’a proposta.
Iha 2023, proposta ne’e aprezenta ba Konsellu Ministru, maibé haruka fila fali ba CNT atu halo estudu no revizaun adisionál.
(dom)
