DILI, STLTIMORLESTE.com – Polísia Nasionál Timor-Leste (PNTL) Munisípiu Díli detein suspeitu na’in-haat ne’ebé envolve iha kazu sona joven ida iha Bedois, Díli.
Tuir Xefe Investigasaun iha PNTL Munisípiu Díli,Superintendente Asistente Polísia Rogério dos Reis, informa katak suspeitu sira hetan detensaun hafoin prosesu identifikasaun iha Eskadra Polísia Becora.
“Ami lori suspeitu na’in-hitu ba Eskadra Polísia Becora atu halo identifikasaun. Rezultadu hatudu katak na’in-haat envolve iha kazu ne’e,”hatete Xefe Investigasaun iha PNTL Munisípiu Díli,Superintendente Asistente Polísia Rogério dos Reis ba jornalista sira iha Komando PNTL Munisipiu Dili, Sesta (16/10/2026).
Nia esplika katak suspeitu na’in-haat agora daudaun iha prosesu detensaun durante oras 72, atu prepara dokumentu no rejistu kazu ba Ministériu Públiku.
Rogério dos Reis hatete katak, konflitu ne’e hahú ho provokasaun verbal no sadik malu entre grupu joven sira, antes situasaun sai grave.
Konflitu ne’e kontinua ho tuda malu, to’o joven ida hetan sona ho tudik iha parte kotuk isin nian.
Vítima hetan kanek grave no transporta ba Ospitál Nasionál Guido Valadares (HNGV) atu hetan tratamentu médiku.
Iha fatin hanesan Fonte konfirmadu Medika iha sala emerjénsia HNGV informa katak vítima hetan tratamentu inisiál antes transfere ba sala operasaun.
Médiku sira halo operasaun atu hasai tudik ne’ebé hela iha isin vítima, tanba kanek grave iha parte kotuk.
“Doutór sira halo tratamentu kedas no transfere pasiente ba sala operasaun atu hasai tudik. Agora, pasiente sei interna tanba nia kanek grave,” fonte médika ne’e afirma.
(jen)
