DILI, STLTIMORLESTE.com – Polísia Nasional Timor-Leste (PNTL) no Komisaun Anti Korrupsaun (KAK) hametin kooperasaun liuhosi formasaun kona-ba prevensaun korrupsaun, integridade no aplikasaun lei ba membru polísia sira.
Komisáriu Adjuntu Prevensaun no Sensibilizasaun KAK, Rosário Salsinha Araújo hatete katak, formasaun ne’e atu hametin kooperasaun entre instituisaun rua.
Nia esplika katak, PNTL no KAK iha akordu memorandu kooperasaun (MoU) atu kombate krime komún no krime korrupsaun.
“Formasaun ne’e importante atu polísia komprende di’ak liután krime korrupsaun no hadia sistema servisu polisiál,” hatete Komisáriu Adjuntu Prevensaun no Sensibilizasaun KAK, Rosário Salsinha Araújo ba jornalista sira iha Sentru Formasaun Polísia (SFP) Comoro, Sesta (16/10/2026).
Nia hatutan katak, instituisaun rua tenke servisu hamutuk atu prevene korrupsaun, ne’ebé bele estraga nasaun, impede dezenvolvimentu no aumenta kiak iha komunidade.
Rosário mós enfatiza katak polísia tenke mantein integridade, evita hahalok korrupsaun no kumpre obrigasaun atu fó ezemplu di’ak ba povu.
Formasaun ne’e mós aborda deklarasaun rikusoin, lei penál no tipolojia krime korrupsaun nian, inklui esperiénsia kona-ba integridade polísia iha nasaun Ázia sira.
Iha fatin hanesan, Komisáriu Adjuntu Investigasaun KAK, Álvaro Maria Freitas, esplika katak uza patrimóniu estadu la tuir autorizasaun bele sai krime pekulatu uza.
Nia hatete katak, movimentu kareta estadu tenke iha autorizasaun, no iha situasaun urjente, funsionáriu tenke informa no hetan koñesimentu husi xefe kompetente.
“Kuandu funsionáriu uza kareta estadu sein autorizasaun, bele iha indikasaun krime pekulatu uza, tuir lei ne’ebé vigora,” Álvaro Maria Freitas afirma.
Nia esplika katak, bainhira deteta violasaun, autoridade tenke haree natureza krime no kompeténsia instituisaun relevante atu determina prosesu tuir lei.
Álvaro hatutan katak, krime korrupsaun bele iha ligasaun ho krime seluk, hanesan falsifikasaun dokumentu ka subornu, ne’ebé presiza investiga atu determina krime prinsipál.
Nia hatete katak, kazu ne’ebé tama iha kompeténsia KAK sei prosesa tuir lei, enkuantu krime komún sira tama iha kompeténsia PNTL.
Nunee mos Segundu Komandante Institutu Superior Sentru Polísia, Superintendente Xefe Joni Viana, hatete katak Komandu-Jerál PNTL haruka komandu munisipál 13, inklui Ataúro, atu partisipa iha formasaun.
Nia afirma katak, formasaun ne’e importante atu membru PNTL komprende Lei Númeru 17/2020 kona-ba medida prevensaun no kombate korrupsaun.
“PNTL tenke komprende lei sira ne’e atu hala’o misaun iha terrenu ho loos no tuir padraun ne’ebé aplika,” Joni Viana afirma.
Nia mós subliña katak, PNTL no KAK tenke kontinua koopera, respeita kompeténsia instituisaun ida-idak no asegura prosesu investigasaun tuir lei.
(jen)
