DILI, STLTIMORLESTE.com – Ministeriu Edukasaun (ME) iha koordenasaun ho Diretór Servisu Edukasaun Munisipál no diretór eskola sira, prepara hela fatin espesiál ba estudante feto grávida sira atu bele tuir ezame nasionál ho seguru no konfortu.
Koordenadór Gabinete Unidade Kurríkulu Nasionál iha ME, João Mau Pelu hato’o informasaun ne’e ba jornalista sira iha Sentru Imprensa Comoro, sexta-feira (16/10/2026).
João Mau Pelu hatete katak, ba ezame nasionál tinan ida-ne’e, iha estudante feto balun ne’ebé iha kondisaun grávida. Maski nune’e, ME seidauk hetan dadus kompletu kona-ba númeru estudante sira ne’e.
“Tinan ida-ne’e iha kazu espesiál balun, estudante feto balun iha kondisaun grávida. Maibé, to’o agora ita seidauk hetan númeru exatu, tanba munisipiu balun seidauk fó informasaun kompletu kona-ba estudante sira ne’e,” João Mau Pelu dehan.
Nia esplika katak, ME koordena ona ho diretór eskola no autoridade edukasaun munisipál sira atu identifika estudante feto grávida no prepara sala espesiál ba sira.
Medida ne’e atu asegura katak estudante feto grávida sira bele tuir ezame nasionál iha ambiente ne’ebé seguru no adekuadu, liuhusi kooperasaun entre ME, servisu edukasaun munisipál no eskola sira.
(jac)
