DILI, STLTIMORLESTE.com — Konsellu Imprensa Timor-Leste (KI-TL), Sekretariadu Estadu Komunikasaun Sosiál (SEKOMS) no organizasaun jornalista sira selebra Loron Nasionál Liberdade Imprensa ho misa agradesimentu no serimónia kari ai-funan, hodi fó omenajen ba jornalista sira ne’ebé lakon sira-nia moris iha luta ba independénsia no defende liberdade imprensa, iha Dili, Sesta (16/10/2026).
Membru Konsellu Imprensa Timor-Leste, Susana Cardoso, hateten katak komemorasaun ne’e sai nu’udar momentu importante atu hanoin fila fali kontribuisaun jornalista sira ne’ebé sakrifika sira-nia moris iha tempu rezisténsia, inklui jornalista sira ne’ebé koñesidu ho naran Balibo Five.
Nia esplika katak omenajen ne’e la’ós de’it ba jornalista sira ne’ebé mate durante luta ba independénsia, maibé mós ba jornalista sira ne’ebé lakon sira-nia moris iha períodu ukun-rasik-an, no sira ne’ebé kontribui atu promove liberdade imprensa iha prosesu dezenvolvimentu nasaun.
Tuir Susana Cardoso, liuhusi komemorasaun ne’e, Konsellu Imprensa, Sekretariadu Estadu Komunikasaun Sosiál no organizasaun jornalista sira mós hato’o apresu ba jornalista sira ne’ebé kontinua hala’o sira-nia knaar atu informa públiku.
Nia subliña katak jornalista sira presiza hametin sira-nia pozisaun profisionál, hala’o knaar ho responsabilidade no garante katak komunidade bele asesu ba informasaun ne’ebé importante.
Iha biban hanesan, Diretór Diresaun Nasionál Dezenvolvimentu Média, Júlio Lopes, ne’ebé reprezenta Sekretáriu Estadu Komunikasaun Sosiál, hato’o agradesimentu ba parte hotu ne’ebé partisipa iha komemorasaun ne’e.
Nia mós apela ba jornalista sira atu kontinua metin iha sira-nia profisaun, defende prinsipiu jornalizmu no kumpre responsabilidade atu fó informasaun ba sosiedade.
Enkuantu ne’e, Domingos Freitas, ne’ebé reprezenta Asosiasaun Jornalista Profisionál Timor-Leste, hato’o apresu ba kontribuisaun jornalista sira ne’ebé lakon ona sira-nia moris, maibé sira-nia servisu no dedikasaun sei sai hanorin ba jerasaun jornalista tuirmai.
“Hau husu ba jornalista Timoroan sira ne’ebé agora daudaun hala’o knaar iha área jornalizmu atu kontinua metin iha sira-nia profisaun no promove informasaun ba públiku ho transparénsia,” dehan Domingos Freitas.
Bazeia ba observasaun STL, hafoin serimónia kari ai-funan iha tasi-ibun Palásiu Governu, Dili, reprezentante média, organizasaun jornalista, Konsellu Imprensa no ekipa SEKOMS kontinua sira-nia programa ho marsa ba Sentru Konvensaun Dili.
Marsa ne’e akompaña husi drum band estudante sira husi Eskola Sekundária Cristal, Dili.
Programa komemorativa ne’e mós inklui atividade relasionada ho profisaun jornalizmu no serimónia entrega prémiu ba jornalista, nu’udar forma atu fó rekonesimentu ba sira-nia kontribuisaun iha área komunikasaun no imprensa.
(jos)
