DILI, STLTIMORLESTE.com – Padre Deonildo de Andrade husu jornalista sira atu defende verdade, uza liberdade imprensa ho responsabilidade no hametin demokrásia.
Iha misa agradesimentu Loron Nasional Liberdade Imprensa Timor-Leste, ba Dala Haat iha Igreja Motael, Sesta (16/10/2026).
Apelu nee hatoo Padre Deonildo de Andrade iha nia omilia bainhira prezide misa agradesimentu ba selebrasaun Loron Nasional Liberdade Imprensa Timor-Leste ba dala haat, ho tema Mídia Livre, Demokrásia Metin.
Nia hateten katak, liberdade imprensa laos de’it direitu atu hato’o informasaun, maibé mos responsabilidade atu buka verdade, verifika faktu no informa públiku ho onestidade.
Tuir Padre Deonildo, jornalista sira nia misaun laos atu defende deit ema neebé iha poder ka buka popularidade, maibé atu hatoo informasaun loos no independente ba públiku.
Nia esplika katak, bainhira informasaun sai instrumentu atu subar verdade, manipula públiku ka promove interese partikular, situasaun ne’e bele hamenus konfiansa públika ba mídia.
Nia mós liga misaun jornalista nian ho Evanjellu loron ne’e, ne’ebé Jesus fo hanoin ba discípulu sira atu kuidadu ho hipokrizia, tanba buat ne’ebé ema subar sei sai nakloke.
Padre Deonildo subliña katak, jornalista sira presiza korajen atu husu pergunta, halo investigasaun no hato’o realidade, maibé korajen ne’e tenke akompaña ho prudénsia, justisa no respeitu ba dignidade umana.
Nia mós fo hanoin katak, liberdade imprensa la signifika direitu atu publika informasaun sein verifikasaun, habelar rumor ka estraga ema seluk nia dignidade.
Iha era rede sosiál no intelijénsia artifisiál, nia husu jornalista sira atu verifika informasaun antes publika, rona parte relevante sira no distingue faktu husi opiniaun, atu evita informasaun sala ne’ebe bele fó impaktu ba sosiedade.
Nia hateten katak, demokrásia metin la depende de’it ba liberdade atu ko’alia, maibé mós ba responsabilidade atu ko’alia ho verdade.
Iha nia omilia, Padre Deonildo mós hanoin fali sakrifísiu jornalista na’in-lima ne’ebé koñesidu ho naran Balibo Five, ne’ebé lakon sira-nia vida iha Balibó, iha 16 Outubru 1975, bainhira halao misaun jornalístika atu informa mundu kona ba situasaun iha Timor-Leste.
Nia dehan katak, istória Balibo Five sai memória importante ba liberdade imprensa no direitu ba informasaun, ne’ebé jornalista sira presiza kontinua hanoin ho respeitu no responsabilidade.
Nia mós konvida jornalista sira atu hametin integridade, sabedoria no korajen iha sira-nia servisu, no husu Maromak atu akompaña sira iha misaun atu defende verdade.
Misa agradesimentu ba Loron Nasional Liberdade Imprensa Timor-Leste ba dala haat ne’e hetan partisipasaun husi jornalista no membru Konsellu Imprensa (KI).
Selebrasaun ne’e sai oportunidade atu hanoin fila-fali kona-ba importánsia liberdade imprensa, responsabilidade profisionál jornalista nian no kontribuisaun mídia independente ba hametin demokrásia iha Timor-Leste.
(joa)
