DILI, STLTIMORLESTE.com – Juiz Prosesu Arjentino Nunes halo inspesaun ba kareta ne’ebé envolve iha kazu omisídiu neglijente iha Tibar.
Tribunál Judisiál Primeira Instánsia Dili (TJPID), inspesiona kareta supa sentina ne’ebé alega soke mate vítima João.
Inspesaun ne’e hala’o hafoin arguidu JB deklara katak kareta ne’e uza atu tula fo’er, nune’e kondisaun iha kotuk kareta nian la apropriadu ba ema atu tabele.
Iha sala julgamentu, arguidu JB deklara katak kareta ne’ebé nia lori mak kareta supa fo’er. Nia mós hatete katak komunidade estraga parte balu husi kareta ne’e hafoin akontesimentu.
“Hau hanoin diak liu ita ba halo kedan inspesaun ba kareta nee,” dehan Juiz Prosesu Arjentino Nunes.
Hafoin rona deklarasaun arguidu nian, juiz deside halo inspesaun direta ba kareta ne’ebé hela iha Tribunal, atu haree kondisaun no kompara ho deklarasaun iha julgamentu.
Inspesaun ne’e partisipa mós Prokuradór Prosesu Bartolomeo de Araujo no Defensór Públiku Henrique Mariz. Sira haree diretamente kondisaun kareta nian, inklui parte besi ne’ebé hetan estragus.
Tuir observasaun STL iha fatin, kareta ne’e ho kor kinur, iha hakerek “supa sentina” ka “toilet” iha nia lolon, no iha númeru matríkula 55.310.
Kazu ne’e akompaña ho akuzasaun krime omisídiu neglijente, ne’ebé previstu iha Artigu 140 Kódigu Penál.
Artigu ne’e prevee pena prizaun to’o tinan haat ka multa ba ema ne’ebé, tanba neglijénsia, kauza ema seluk nia mate. Se hahalok ne’e envolve neglijénsia grave, pena prizaun bele to’o tinan lima.
Hafoin inspesaun remata, prosesu julgamentu kontinua ho rona testemuña sira.
(ter)
