DILI, STLTIMORLESTE.com – Kafe kontinua sai produtu prinsipál esportasaun Timor-Leste, ho kontribuisaun importante ba rendimentu família rurál no ekonomia nasionál.
Ministru Agrikultura, Pekuária, Peskas no Floresta (MAPPF), Marcos da Cruz, hato’o informasaun ne’e durante komemorasaun Loron Mundiál Ai-han ba dala 45, iha Salaun Veteranus, Comoro, sexta-feira (16/10/2026).
Nia esplika katak, iha tinan 2025, Timor-Leste esporta kafe Arabika tonelada 4.724 no kafe Robusta tonelada 667, ho totál tonelada 5.391.
Aleinde kafe, Timor-Leste mós esporta produtu agríkola seluk, inklui kami tonelada 3.135, kopra tonelada 2.735, akar-musan tonelada 1.121, maek tonelada 770 no cengkeh tonelada 63.
Marcos da Cruz dehan katak atu aumenta valór no kompetitividade produtu lokál, presiza investe iha prosesamentu, armazenamentu, embalagem, sertifikasaun no asesu ba merkadu.
Nia hateten katak, Governu labele realiza transformasaun iha setór agrikultura mesak, maibé presiza servisu hamutuk ho parseiru dezenvolvimentu nasionál no internasionál.
Nia hato’o apresiasaun ba Organizasaun Ai-han no Agrikultura Nasoins Unidas (FAO), Programa Ai-han Mundiál (WFP), Organizasaun Saúde Mundiál (WHO), UNICEF, UNDP, Banku Dezenvolvimentu Aziátiku, Banku Mundial no União Europeia.
Nia mós apresia apoiu hosi parseiru bilaterál sira, inklui Austrália, Xina, Japaun, Korea, Alemaña, Nova Zelándia no Indonézia, ba dezenvolvimentu Timor-Leste.
“Presiza fasilita asesu ba finansiamentu, formasaun, teknolojia, infraestrutura no informasaun merkadu.”
Ministru ne’e subliña, katak importante atu hametin ligasaun entre produtór lokál, supermerkadu, hotel, restaurante, instituisaun públika no programa merenda eskolar.
Nia hatutan katak, investimentu iha estrada rurál, transporte, armazenamentu, cadeia friu no prosesamentu bele ajuda hamenus lakon produtu no aumenta valór komersiál.
Nia afirma katak, importasaun sei kontinua atu kompleta nesesidade nasionál bainhira produsaun lokál seidauk sufisiente, maibé kapasidade produsaun doméstika presiza aumenta.
Ministériu sei kontinua hametin kapasidade sanitária atu proteje saúde públika no asegura katak produtu ai-han kumpre padraun seguransa ai-han.
(dom)
