BAUCAU, STLTIMORLESTE.com – Eis-Prezidente Repúblika, Taur Matan Ruak, hato’o parabéns ba jornalista sira iha Timor-Leste no husu atu jornalista sira kontinua hala’o knaar ho profisionál hodi kontribui ba demokrasia iha nasaun.
Mensajen ne’e hato’o liuhusi vídeo ho durasaun minutu 1 no segundu 50, ne’ebé publika iha pájina ofisiál Taur Matan Ruak no asesu husi STL iha loron 16 Outubru 2026 ambitu selebrasaun loron liberdade imprensa ba dala haat iha Timor-Leste.
Iha vídeo ne’e, Taur Matan Ruak subliña katak liberdade imprensa no papel jornalista nian iha sosiedade importante tebes, liuliu iha tempu konflitu no luta ba ukun rasik-aan, jornalista sira iha responsabilidade lori informasaun kona-ba situasaun iha Timor-Leste ba komunidade internasionál.
“Iha funu ba ukun rasik-aan, jornalista sira asume papel importante tebes iha ita-nia luta. Liuhusi jornalista sira, informasaun fahe ba mundu, hodi mundu tomak bele hatene situasaun ne’ebé akontese iha ita-nia rai,” Taur Matan Ruak afirma.
Nia hatutan katak, depois Timor-Leste hetan independénsia, knaar jornalista sira nian sai importante liután, tanba imprensa iha responsabilidade atu fó informasaun ba públiku no kontribui ba hametin demokrasia iha nasaun.
Tanba ne’e, Taur Matan Ruak hato’o parabéns ba jornalista hotu-hotu iha Timor-Leste, rejiaun no mundu tomak, no enkoraja sira atu kontinua hala’o knaar ho dedikasaun no valoriza profisaun jornalizmu.
“Kontinua nafatin servisu di’ak no fó valor ba imi-nia servisu, hodi kontribui ba demokrasia iha ita-nia rai,” nia afirma.
(tom)
