SYDNEY, STLTIMORLESTE.com – Prezidente Repúblika (PR), José Ramos-Horta, husu públiku atu respeita jornalista no uza plataforma dijitál ho responsabilidade, hodi kombate desinformasaun no proteje kualidade debate públiku.
Apelu ne’e hato’o liuhusi mensajen ofisiál ba komemorasaun ba dala-IV Loron Nasionál Liberdade Imprensa, iha 16 Outubru 2026, ho énfaze ba kontribuisaun jornalista sira iha transparénsia públika no konstrusaun Estadu demokrátiku.
Xefe Estadu reafirma kompromisu metin atu defende liberdade imprensa, liberdade ko’alia no liberdade espresaun, ne’ebé sai prinsipiu importante ba konstrusaun no konsolidasaun Estadu demokrátiku.
“Respeita ba kontribuisaun jornalista sira no mídia sira seluk, ne’ebé fornese informasaun ba públiku. Sira nia kna’ar mak fahe informasaun,” dehan Prezidente Repúblika.
Ramos-Horta hateten, katak informasaun ho kualidade no integridade promove debate, partisipasaun sidadaun no kontribui ba haforsa transparénsia iha vida públika.
Nia apela ba jornalista no instituisaun mídia sira atu kontinua hala’o kna’ar ho responsabilidade, matenek, independénsia, profisionalizmu no respeitu ba étika jornalístika.
Prezidente Repúblika mós enfatiza importánsia atu garante ambiente seguru no favorável ba jornalista sira, atu sira bele hala’o kna’ar ho liberdade, asesu ba informasaun no protesaun ba fonte informasaun, tuir lei no prinsipiu demokrátiku.
Nia enkoraja instituisaun Estadu, mídia, organizasaun jornalista, sosiedade sivíl no sidadaun hotu atu hametin kultura diálogu, toleránsia, pluralizmu no respeitu ba opiniaun diferente.
“Ha’u halo apelu atu ita uza mídia no plataforma dijitál ho responsabilidade, liuliu iha kombate desinformasaun, hodi proteje kualidade debate públiku no sidadaun sira nia asesu ba informasaun,” Ramos-Horta dehan.
Selebra Loron Mundial Liberdade Imprensa atu promove liberdade imprensa, independénsia mídia no seguransa jornalista sira. Loron ne’e mós fó énfase ba direitu sidadaun atu asesu informasaun livre no fiável.
Liberdade imprensa iha papél importante iha Estadu demokrátiku, tanba jornalista sira bele hato’o informasaun ba públiku, investiga asuntu interese públiku no responsabiliza instituisaun sira.
Iha era dijitál, kombate desinformasaun no promove uza plataforma dijitál ho responsabilidade sai dezafiu importante, atu proteje informasaun ho kualidade no haforsa konfiansa públika.
(eme)
