VIQUEQUE, STLTIMORLESTE.com – Autoridade Munisipál Viqueque aloka ona orsamentu US$ 150,000 ba sosa kareta haat (4) atu reforsa servisu públiku, inklui transladasaun mate-isin, resposta ba emerjénsia dezastre naturál no apoiu operasionál ba servisu munisipál iha terrenu.
Prezidente Autoridade Munisipál Viqueque, Francisco C. S. de G. Soares, esplika katak, maski ezekusaun orsamentu 2026 ne’ebé rejista iha portal transparénsia atinji ona 82%, ezekusaun finanseira real foin atinji liu 70%, tanba pagamentu ba kapitál menór balu seidauk realiza, hein prosesu aprovizionamentu remata.
“Kareta haat ne’ebé tama iha prosesu aprovizionamentu agora hein de’it kompania atu entrega kareta sira ne’e, atu prosesu pagamentu bele la’o,” Francisco hateten ba STL liuhusi telefone, Segunda (19/10/2026).
Nia esplika katak, kareta haat ne’ebé sosa ne’e kompostu husi kareta funeráriu rua, kamioneta ida no kareta ida ba funsionáriu munisipál.
Kareta funeráriu rua ne’e sei utiliza atu responde ba pedidu transladasaun mate-isin husi Postu Administrativu sira, tanba Munisipiu Viqueque enfrenta limitasaun kareta espesífika ba servisu refere no dala ruma presiza depende ba apoiu husi munisipiu seluk.
Enkuantu kamioneta ne’e sei utiliza hodi apoia Servisu Autoridade Protesaun Sivil iha transportasaun no resposta ba emerjénsia, liuliu bainhira akontese dezastre naturál. Kareta ida seluk sei utiliza hodi apoia servisu funsionáriu munisipál iha terrenu.
“Ba kareta haat ne’e, total orsamentu ne’ebé aloka mak US$ 150 mil Agora prosesu aprovizionamentu iha ona, hein de’it kompania atu entrega. Iha finál fulan Outubru, kareta sira ne’e tenke tama ona, atu bele kumpre prazu loron 40 ne’e,” nia afirma.
Maski nune’e, Francisco admite katak alokasaun orsamentu ba kareta haat iha tinan 2026 seidauk sufisiente atu responde ba nesesidade transporte iha Munisipiu Viqueque tomak. Tanba Administradór Postu Administrativu sira kontinua utiliza kareta ne’ebé kondisaun la di’ak, ne’ebé difikulta akompañamentu servisu no monitorizasaun projetu iha terrenu.
Nune’e, Autoridade Munisipál Viqueque planeia aloka tan orsamentu iha tinan 2027 atu sosa kareta ba Administradór Postu Administrativu lima.
Francisco dehan katak, orsamentu ne’ebé planeia atu sosa kareta ba Autoridade Postu sira atu fasilita operasionál administrasaun postu sira, inklui monitorizasaun implementasaun projetu Dezenvolvimentu Integradu Munisipál (PDIM) no Programa Nasionál Dezenvolvimentu Suku (PNDS).
“Ba APA sira, tinan ida-ne’e ita sei tau alokasaun besik US$ 300,000 atu sosa kareta ba postu lima, hodi fasilita operasionál,” nia dehan.
Entertantu planu alokasaun orsamentu ba 2027 ne’e sei depende ba prosesu planeamentu no aprovasaun orsamentu, ho objetivu atu hadi’a kapasidade transporte no asegura katak administradór sira bele akompaña implementasaun projetu dezenvolvimentu iha sira-nia área jurisdisaun.
(tom)
