DÍLI, STLTIMORLESTE.com — Prezidénsia Repúblika (PR) hahú konstrusaun uma dignu ba inan-faluk Rozena Bileto Pereira, iha Aldeia Tuluata, Suku Bobonaro, Munisípiu Bobonaro.
Uma ne’e iha medida 8 × 7 metru, ho kuartu tolu, sentina no dapur. Konstrusaun ne’e nu’udar kontribuisaun pesoál hosi Prezidente Repúblika, José Ramos-Horta.
Inisiativa ne’e atu ajuda família Rozena, ne’ebé enfrenta difikuldade moris hafoin lakon membru família balu iha tinan hirak liubá.
Iha 4 Abríl 2021, inundasaun no rai-monu rezulta mate oan-feto na’in rua, Maria Lurdes Taní no Jaina Pereira Martins.
Depois, iha 2023, Rozena mós lakon nia kaben, Manuel Henriques, tanba moras. Lakon hirak ne’e aumenta família nia vulnerabilidade no difikuldade atu responde ba nesesidade bázika loroloron.
Reprezentante família, Mateus Guterres hato’o agradesimentu ba Prezidente José Ramos-Horta tanba apoiu ne’e.
Nia konsidera apoiu ne’e nu’udar esperansa foun ba família atu hetan uma ne’ebé seguru no dignu.
Koordenadóra Sosiedade Sivil no Asuntu Sosiál, Tereza dos Santos Ximenes esplika katak, konstrusaun ne’e mak inisiativa pesoál hosi Prezidente Repúblika, la’ós projetu konstrusaun governu.
Nia mós agradese autoridade lokál sira ne’ebé kontinua apoia prosesu konstrusaun uma ne’e.
Tereza hatete katak, konstrusaun sei tuir prosedimentu ne’ebé eziste, no espera bele remata iha períodu fulan haat, depende ba kondisaun klima.
Nia husu família atu iha pasiénsia durante prosesu konstrusaun no asegura katak ekipa no autoridade sira sei kontinua tau matan ba servisu to’o remata.
Ho apoiu ne’e, família Rozena espera bele hetan kondisaun moris ne’ebé di’ak liután no hela iha uma seguru ho fasilidade bázika.
(eme)
