BAUCAU, STLTIMORLESTE.com – Autoridade kompetente sira iha Munisípiu Baucau prepara ona planu prevensaun ba komunidade sira iha foho ne’ebé enfrenta risku falta bee moos no ai-han iha Bai-loron naruk.
Diretór Servisu Munisípal Agrikultura Baucau, Agostinho Ximenes, informa katak autoridade sira hala’o ona enkontru ho instituisaun relevante iha 15 Outubru 2026, atu prepara apoiu ba família vulnerável sira.
“Karik to’o finál Novembru ka Dezembru udan seidauk monu, ami sei halo prevensaun no fó apoiu ba komunidade sira,” Agostinho Ximenes informa ba STL iha Vila Nova, Baucau, Sábadu (17/10/2026).
Nia hateten katak komunidade sira iha área foho, liuliu Postu Administrativu Quelicai Antigu, Matebian, Quelicai no Laga, sai prioridade tanba enfrenta limitasaun bee moos no produsaun ai-han.
“Komunidade sira iha rai tetuk iha produsaun, maibé sira ne’ebé hela iha foho enfrenta difikuldade tanba produsaun ai-han ne’ebé sira hetan la to’o atu sustenta família,” nia dehan.
Enkontru ne’e envolve Diresaun Dezastre Naturais, Autoridade Protesaun Sivíl, Diresaun Seguransa Alimentár no instituisaun relevante sira seluk iha Munisípiu Baucau.
Tuir planu, karik iha inísiu fulan Novembru udan seidauk monu rai, ekipa Munisípal sei vizita área foho sira atu halibur dadus no identifika nesesidade komunidade nian, hodi determina apoiu bee moos no ai-han.
Agostinho mensiona Laga, Binagua, Quelicai Antigu, Afaça no Guruça Namanei no iha área foho sira ne’ebé presiza atensaun tanba limitasaun bee.
“Karik udan seidauk monu, ita sei identifika komunidade sira iha área hirak-ne’e tanba bee laiha. Ida-ne’e mak ami ko’alia ona iha enkontru,” nia esplika.
Nia husu mós ba komunidade sira atu rai no jere didi’ak ai-han ne’ebé disponivel, enkuantu autoridade sira sei fó prioridade ba família sira ne’ebé presiza asisténsia urjente.
“Komunidade sira tenke rai sira-nia ai-han. Família sira ne’ebé enfrenta situasaun ne’e, ita tenke ba ajuda lalais,” Agostinho afirma.
(tom)
