DILI, STLTIMORLESTE.com — Ministru Justisa (MJ), Sérgio Hornai afirma katak, Timor-Leste kontinua prepara Konferénsia Ministru Justisa Komunidade Pais Lingua Portugues (MJ-CPLP), ne’ebé sei hala’o iha loron 26 no 27 fulan Outubru 2026, ho prioridade ba hametin kooperasaun jurídika no kombate krime organizadu transnasionál.
Sérgio Hornai hato’o informasaun ne’e ba STL, iha Palásiu Governu, Dili, Segunda-feira (19/10/2026), hafoin hala’o enkontru ho Primeiru-Ministru, Kay Rala Xanana Gusmão, atu atualiza progresu preparasaun ba konferénsia ne’e.
“Hau hanoin, preparasaun ne’e envolve koordinasaun ho ministériu relevante sira, ekipa téknika no Estadu-membru sira husi Komunidade Países de Língua Portuguesa (CPLP), atu asegura konferénsia bele hala’o ho susesu, tanba nee maka ohin Mai relata progresu Serbisu ba PM Xanana,” afirma MJ.
Nia dehan, Konferénsia ne’e sei fó atensaun ba krime organizadu transnasionál, inklui fraude no atividade ilísita sira ne’ebé sai preokupasaun ba Timor-Leste, rejiaun no komunidade internasionál.
“Hau hanoin krime transnasionál la’ós de’it sai dezafiu ba Timor-Leste, maibé mós ba Estadu-membru CPLP sira no nasaun seluk iha mundu. Tanba ne’e, kooperasaun entre nasaun sira sai elementu importante atu hametin sistema justisa no kombate krime sira-ne’e,” dehan Ministru Justisa Sérgio Hornai.
Atu prepara konferénsia, Ministériu Justisa halo koordinasaun ho Estadu-membru CPLP sira, inklui Angola, Brasil, Portugal, Kabu Verdi, São Tomé no Príncipe, Guiné Ekuatorial, Moçambique no Guiné-Bissau, atu asegura partisipasaun no disponibilidade delegasaun sira.
Nune’e mós, konferénsia ne’e sai oportunidade ba Estadu-membru sira atu hametin relasaun institusionál, haforsa kooperasaun iha área justisa no dezenvolve estratéjia komún atu responde ba dezafiu jurídiku transnasionál.
Timor-Leste, nu’udar Estadu-membru CPLP, kontinua promove kooperasaun ho nasaun sira-ne’e, ho língua portuguesa nu’udar meiu komunikasaun komún ne’ebé kontribui ba unidade no hametin relasaun entre Estadu-membru sira.
(jos)
