METINARO, STLTIMORLESTE.com – Ofisiál superior FALINTIL-Forsa Defeza Timor-Leste (F-FDTL) na’in 15 hahú Kursu Konsolidasaun Lian Portugés iha Metinaro, atu hametin komunikasaun no kooperasaun militár internasionál.
Liu husi Komunikadu Impresa ne’ebe STL asesu iha media F-FDTL katak, iha loron segunda (19/10/2026) iha serimónia abertura kursu ne’e prezide husi Adjuntu Xefe Estadu Maior F-FDTL, Koronél Tirocinado Mário Baptista “Bersama”.
Serimónia ne’e mós marka prezensa Komandante CICNL, Tenente-Koronél Infantaria Elizeu Guterres “SABE AS”, Diretór no Asesór Tékniku husi Projetu N.º 2.
Kursu ne’e organiza husi Projetu N.º 2 Kooperasaun iha Domíniu Defeza no sei hala’o to’o 18 Dezembru 2026.
Objetivu formasaun ne’e mak dezenvolve kapasidade lian Portugés ba militár timoroan sira, hodi fasilita komunikasaun no koordenasaun iha atividade defeza.
Formasaun ne’e mós prepara ofisiál superior sira atu partisipa iha ezersísiu militár multinasionál FELINO, ne’ebé planeia hala’o iha Timor-Leste iha tinan 2027 no 2028.
Liu husi kursu ne’e, espera katak partisipante sira sei aumenta abilidade ko’alia no komprende lian Portugés, hodi fasilita kolaborasaun ho forsa armada husi nasaun sira ne’ebé integra iha Comunidade dos Países de Língua Portuguesa (CPLP).
Inisiativa ne’e hatudu kompromisu F-FDTL atu kontinua hasa’e kualidade rekursu umanu, hametin kapasidade profisionál militár no dezenvolve kooperasaun internasionál iha área defeza.
(jen)
