BAUCAU, STLTIMORLESTE.com – Autoridade Munisipál Baucau identifika suku lima (5) enfrenta risku falta bee iha tempu bailoron, enkuantu Suku Afaça, Postu Administrativu Quelicai Antigu, identifika afeta ba inseguransa ai-han.
Diretór Servisu Munisipál Seguransa Alimentár, Agapito Boavida Pinto, hateten katak preparasaun ba antesipasaun impaktu El Niño no bailoron naruk ekipa sira seidauk kobre suku hotu atu rekolla informasaun kona-ba situasaun bee moos no ai-han iha nível suku,
Maibé, bazeia ba konstátasaun ne’ebé Servisu Munisípal Seguransa Alimentar hetan, Suku Afaça sai infrenta problema inseguransa ai-han iha Munisípiu Baucau.
“Tuir konstátasaun ne’ebé ita hala’o, Suku Afaça mak sei afeta ba inseguransa ai-han, tanba iha ne’ebá ministériu hotu-hotu konsentra sira-nia programa, sai pilotu ba Munisípiu Baucau,” Agapito Boavida Pinto hateten ba STL iha Vila Nova, Baucau, tersa-feira (20/10/2026).
Tanba ne’e, nia husu komunidade no lia-na’in sira atu reduz gastu ba programa lia-mate no lia-moris, inklui atividade sosiál sira, hodi minimiza despeza no asegura disponibilidade ai-han ba nesesidade família nian durante tempu bailoron naruk.
Nia rekomenda atu komunidade avalia fali durasaun programa sira, hodi evita gastu ne’ebé bele hamenus rekursu família nian ba nesesidade bázika.
“Husu komunidade atu reduz programa lia-mate no lia-moris no evita estragu hahán. Karik programa lia ne’ebé planeia atu hala’o durante fulan ida, bele reduz ba semana ida,” Agapito rekomenda.
Suku lima enfrenta risku falta bee
Iha parte seluk, Diretóra Servisu Munisipál Água, Saneamentu no Ambiente (SMASA) Baucau, Norberta da Costa, informa katak rezultadu mapamentu rekursu bee identifika iha Munisípiu Baucau Suku lima enfrenta risku kona-ba asesu ba bee, liuliu durante tempu bailoron.
Suku lima ne’ebé tama iha klasifikasaun risku mak Suku Guruça, Afaça no Namanei, iha Postu Administrativu Quelicai Antigu, Suku Kaikua, iha Postu Administrativu Vemasse, no Suku Maluru, iha Postu Administrativu Matebian.
Norberta esplika katak komunidade iha suku lima ne’e dala barak enfrenta difikuldade atu hetan bee moos durante tempu bailoron, tanba rekursu bee balu menus ka maran.
Tanba ne’e, Autoridade Munisipál Baucau liuhusi enkontru koordenasaun kria ona mekanizmu atu prepara apoiu ba komunidade sira ne’ebé hetan impaktu husi El Niño, liuliu atu asegura asesu ba bee ba nesesidade loroloron.
“Bee iha suku lima ne’e maran duni, mak oinsá ita nia asaun atu fó ajuda, lori bee ba sira, no oinsá sira bele asesu bee loroloron,” Norberta da Costa dehan.
Autoridade prepara sistema alerta sedu
Enkuantu ne’e, Sekretáriu Munisipál Planeamentu Investimentu no Dezenvolvimentu Integradu, Eduardo Filipe Ximenes, hateten katak proposta kona-ba mapamentu no sistema alerta sedu ba antesipasaun impaktu El Niño hahú husi sirkulár ne’ebé inisia husi Autoridade Protesaun Sivíl, no aprezenta ona iha reuniaun Konsellu Koordenasaun Munisipál atu hetan aprovasaun iha nível munisipál.
Eduardo esplika katak, sistema ne’e sei fasilita koordenasaun entre diresaun sira atu identifika suku ne’ebé presiza asisténsia ai-han no bee moos, liuliu Suku Afaça no Abafala.
“Mapamentu no sistema alerta sedu ba antesipasaun impaktu El Niño ida ne’e ita sei aprova, atu diresaun sira ne’ebé ita temi halo koordenasaun konjunta hodi identifika suku sira ne’ebé presiza hahán no bee moos, atu ita bele tulun sira, liuliu Suku Afaça no Abafala,” Eduardo hateten.
Nia afirma katak, prioridade tenke fó ba protesaun rekursu bee moos no ai-han, liuhusi mapamentu área vulnerável no bee-matan sira ne’ebé identifika ona husi DNRAS no SMASA.
Ho nune’e, Autoridade Munisipál Baucau hamutuk ho entidade relevante sira sei hametin sistema alerta sedu atu fó avizu ba komunidade bainhira iha risku impaktu El Niño, hodi permite preparasaun no medida resposta tuir nesesidade iha área vulnerável sira.
(tom)
