DÍLI, STLTIMORLESTE.com – Foinsa’e Katólika presiza partisipa ativamente iha atividade igreja atu hametin fiar, forma karakter no sai masin no naroman mundu nian.
Lia hirak ne’e hato’o husi Padre Placido T. Freitas, SDB ba STL iha Salaun Arquidiocese Dili, Tersa (20/10/2026).
Padre Placido esplika katak, iha ema ida-idak nia moris, sempre iha momentu di’ak no aat, inklui momentu naroman no nakukun.
Tanba ne’e, buat importante mak aprende husi esperiénsia pozitivu atu bele enfrenta situasaun difísil ho maneira loos.
Nia hateten katak, momentu nakukun mós bele sai oportunidade aprendizajen, tanba liuhusi esperiénsia negativa, ema bele avalia no hadi’a an rasik atu sai ema ne’ebé di’ak liután.
Tanba ne’e, nia rekomenda ba foinsa’e Katólika Timor-Leste hotu atu partisipa ativu iha atividade Igreja nian, liuhusi dalan oioin, la’ós de’it iha misa, maibé mós iha atividade fiar nian seluk ne’ebé Igreja organiza.
Nia haktuir katak, partisipasaun iha atividade Igreja bele ajuda foinsa’e sira hametin fiar, forma karakter no dezenvolve maturidade, atu bele sai foinsa’e ne’ebé responsavel no kumpre knaar nu’udar masin no naroman mundu nian.
(joa)
