DÍLI, STLTIMORLESTE.com – Juventude Timor-Leste tenke partisipa ativu iha vida sosiál no polítika, hodi defende dignidade umana, promove solidariedade no kontribui ba bem komún.
Lia hirak-ne’e hato’o husi Padre Placido T. Freitas, SDB, nu’udar oradór iha semináriu ho tema “Foin Sa’e iha Vida Sosiál no Polítika, Tuir Hanorin São João Paulo II”, iha Salaun Arquidiocese Dili, Tersa (20/10/2026).
Padre Placido esplika katak, semináriu ne’e foka ba hanorin Papa São João Paulo II kona-ba papél juventude nian iha vida sosiál no polítika, liuliu kona-ba respeitu ba dignidade umana, haburas solidariedade no defende ema kiak sira.
Tuir nia, hanorin ne’e sai baze atu analiza situasaun sosiál no polítika iha Timor-Leste, hodi ajuda joven sira komprende sira-nia responsabilidade iha konstrusaun futuru nasaun nian.
“Ha’u koko dezafia joven sira ne’ebé tuir semináriu ne’e atu reflete se sira bele sai masin no naroman mundu nian, hanesan mensajen Papa São João Paulo II hato’o bainhira vizita Timor iha 12 Outubru 1989,” nia hatete.
Nia subliña katak, atu sai masin no naroman mundu nian, joven sira tenke aprende sai responsavel no partisipa ativu iha atividade sosiál no polítika, inklui eleisaun no debate públiku.
Padre Placido afirma katak, desizaun ne’ebé juventude foti ohin loron sei iha impaktu ba sosiedade no forma futuru nasaun nian. Tanba ne’e, joven sira labele husik responsabilidade atu dezenvolve nasaun ba ferik-katuas no veteranu sira de’it, maibé tenke sai protagonista iha mudansa sosiál.
Nia mós enfatiza katak, respeitu ba dignidade umana mak prinsipiu importante ida iha hanorin Igreja Katólika. Desizaun hotu ne’ebé foti iha vida sosiál no polítika tenke konsidera no respeitu ema seluk nia dignidade.
Oradór ne’e enkoraja joven sira atu hato’o sira-nia hanoin no aspirasaun liuhusi debate públiku, manifestasaun no mídia sosiál, inklui Facebook no TikTok, ho maneira responsavel no konstrutiva.
Nia esplika katak, partisipasaun iha debate públiku la’ós atu trata malu, maibé atu hato’o hanoin no buka solusaun ba problema sosiál ne’ebé komunidade enfrenta, inklui falta asesu ba estrada.
Tuir nia, bainhira joven sira hato’o problema komunidade nian iha espasu públiku, autoridade sira bele rona no buka solusaun ba problema hirak-ne’e.
Iha parte seluk, joven Gil da Costa Gomes Soares hatete katak, semináriu ho tema “Foin Sa’e iha Vida Sosiál no Polítika” relevante tebes ba joven sira ohin loron atu komprende didi’ak doutrina Igreja Katólika kona-ba moris loron-loron nian.
Nia hatutan katak, semináriu ne’e ajuda joven sira atu hanoin didi’ak molok foti desizaun ka halo asaun ruma, hodi hatene saida mak bele halo no saida mak labele halo tuir hanorin Igreja Katólika.
(joa)
