DILI, STLTIMORLESTE.com — Komisaun Anti Korrupsaun (KAK) sei haruka ekipa investigadór sira ba terenu atu verifika implementasaun programa merenda eskolar, inklui menu no kuantidade hahán ne’ebé kompania fornecedór sira fornese ba estudante sira.
Komisáriu Adjuntu ba Investigasaun KAK, Alvaro Freitas, hateten katak despaxu atu hala’o atividade verifikasaun ne’e aprova ona.
Alvaro Freitas hato’o informasaun ne’e ba jornalista sira iha edifísiu KAK, Farol, Tersa (20/10/2026).
Nia esplika katak, atividade ne’e atu verifika se kompania fornecedór sira kumpre duni orientasaun no menu ne’ebé Ministériu Edukasaun (ME) determina ba programa merenda eskolar.
Nia hateten katak, verifikasaun sei inklui kuantidade hahán ne’ebé fornese ba estudante sira, hanesan naan, atu haree se kuantidade ne’ebé kompania sira fornese tuir duni padraun ne’ebé hakerek iha livru menu merenda eskolar.
Atu fasilita prosesu verifikasaun iha terenu, KAK husu ona ba Ministériu Edukasaun atu haruka livru manual ka dokumentu orientasaun kona-ba menu merenda eskolar. Dokumentu hirak ne’e sei sai referénsia ba investigadór sira atu kompara menu ne’ebé rekomenda ho hahán ne’ebé kompania sira fornese ba estudante sira.
Alvaro Freitas afirma katak, despaxu ba atividade ne’e aprova ona no ekipa investigadór sira sei hala’o servisu iha terenu atu rekolla informasaun no verifika implementasaun programa merenda eskolar.
Atividade ne’e sei fó atensaun ba kumprimentu menu no kuantidade hahán, hodi ajuda KAK hetan informasaun ne’ebé presiza kona-ba implementasaun programa merenda eskolar.
Iha sorin seluk, akademiku Sebastião dos Santos dehan katak, presiza halo verifikasaun ba menu eskolár ne’ebé aprova ona, tanba iha posibilidade katak menu ne’ebé implementa iha eskola sira la hanesan ho menu ne’ebé aprezenta.
“Presiza kontrola menu sira ne’e, tanba se lae, menu ne’ebé sai ofisiál bele diferente ho menu ne’ebé implementa iha eskola sira. Implementasaun tenke tuir regra ne’ebé estabelese ona,” dehan nia.
Nia hatutan katak, programa menu eskolár ne’e utiliza osan Estadu nian. Tanba ne’e, tenke prepara hahán ne’ebé nutritivu no di’ak ba estudante sira, atu proteje sira nia saúde no apoia sira nia dezenvolvimentu.
(ter)
