DILI, STLTIMORLESTE.com – Komisáriu Adjuntu Investigasau Komisaun Anti Korrupsaun (KAK), Alvaro Freitas hateten katak, KAK iha prosedimentu padraun atu halo averiguasaun ba keixa no informasaun sira ne’ebé simu, inklui informasaun ne’ebé mai husi komunidade, mídia sosiál no deputadu sira durante intervensaun iha plenária Parlamentu Nasionál.
Alvaro Freitas hateten katak, KAK sempre fó atensaun ba informasaun sira ne’ebé iha indikasaun kona-ba krime, hodi halo prosesu rekolla informasaun atu verifika no determina faktu sira.
Nia esplika katak, Unidade Informasaun no Seguransa mak sei husu dokumentu relevante ba entidade ka ministériu sira ne’ebé iha ligasaun ho informasaun ne’ebé hetan, inklui kazu ne’ebé relasiona ho problema iha fornesimentu ai-moruk.
“Averiguasaun ne’e ita husu ba entidade ka ministériu ne’ebé iha relasaun ho informasaun ne’e atu fornese dokumentu sira. Husi dokumentu hirak ne’e, mak ita sei halo estudu no análize,” nia dehan.
Alvaro Freitas hateten katak, iha kazu fornesimentu ai-moruk, KAK presiza analiza dokumentu sira, liuliu akordu ka kontratu ne’ebé halo entre ministériu no kompania fornese ai-moruk.
Nia esplika katak, análize ne’e importante atu determina se iha incumprimentu kontratu ne’ebé bele iha konsekuénsia sivíl, ka iha irregularidade iha prosesu aprovizionamentu ne’ebé bele lori ba responsabilidade kriminál.
Se kompania ida halo kontratu ho ministériu atu fornese ai-moruk, maibé la kumpre obrigasaun tuir kontratu, situasaun ne’e bele tama iha ámbitu responsabilidade sivíl. Maibé, se iha indikasaun kona-ba irregularidade iha prosesu tenderizasaun ka aprovizionamentu, presiza halo análize kle’an atu determina se hahalok hirak ne’e bele konstitui krime.
Tanba ne’e, nia subliña katak, importante atu distingue entre incumprimentu kontratu sivíl no irregularidade iha prosesu tenderizasaun, tanba kazu rua ne’e iha natureza no konsekuénsia jurídika ne’ebé la hanesan.
Nia mós esplika katak, se iha alegasaun kona-ba ai-moruk ne’ebé la kumpre padraun kualidade no kauza ema mate, presiza iha teste, dokumentu no prova relevante atu determina kauzalidade no responsabilidade husi parte sira ne’ebé envolve.
Alvaro Freitas hateten katak, investigasaun tenke bazeia ba faktu no prova, hodi determina se problema ne’e relasiona ho incumprimentu kontratu, irregularidade iha prosesu aprovizionamentu, ka hahalok ne’ebé bele iha natureza kriminál.
Alvaro Freitas afirma katak, KAK hala’o servisu ho profisionalizmu no hakarak atu públiku komprende katak informasaun hotu-hotu ne’ebé simu presiza hetan análize tuir prosedimentu no bazeia ba prova.
Nia mós hateten katak, sei fó orientasaun klaru ba investigadór sira atu rekolla informasaun ne’ebé presiza, hodi asegura katak prosesu investigasaun lao tuir dalan ne’ebé loos.
KAK konsidera katak, importante atu la mistura asuntu sivíl ho asuntu kriminál, maibé tenke analiza kada kazu tuir natureza, faktu no prova ne’ebé iha.
Iha sorin seluk, komunidade Suku Komoro, Elizeu de Jesus, husu ba Komisaun Anti-Korrupsaun (KAK) atu halo investigasaun kona-ba krize ai-moruk, tanba públiku barak hatudu preokupasaun kona-ba situasaun ne’e.
“Ha’u preokupa kona-ba ai-moruk sira ne’ebé iha, liuliu ai-moruk sira ne’ebé fornese mai. Tanba ne’e, ha’u husu atu halo investigasaun,” dehan Elizeu de Jesus.
Nia kontinua hatutan katak, investigasaun importante atu hatene ho klaru oinsá prosesu distribuisaun ai-moruk sira ne’e hala’o no oinsá ai-moruk sira ne’e tama mai. Tanba ne’e, nia tau fiar ba KAK atu buka no verifika informasaun sira ne’ebé relasiona ho asuntu ne’e.
Rekorda katak, antes ne’e, Komisaun F, ne’ebé trata asuntu Saúde, Seguransa Sosiál no Igualdade Jéneru iha Parlamentu Nasionál, husu ona KAK atu investiga Institutu Nasionál Farmásia no Produtu Médiku (INFPM), relasiona ho krize ai-moruk no alegasaun kona-ba irregularidade iha prosesu sosa ai-moruk.
(ter)
