DILI, STLTIMORLESTE.com — Primeiru-Ministru (PM) Kay Rala Xanana Gusmão lidera enkontru interministeriál atu avalia no koordena preparasaun Timor-Leste ba Prezidénsia ASEAN 2029, ho énfaze ba infraestrutura, rekursu umanu, diplomásia, programa no lojístika, iha Ministériu Negósiu Estranjeiru no Kooperasaun (MNEK), Pantai Kelapa, Dili, Segunda-feira (26/10/2026).
Preparasaun ne’e atu asegura katak instituisaun nasionál sira iha koordenasaun no kapasidade ne’ebé adekuada atu organiza enkontru rejionál no simu delegasaun internasionál durante períodu Timor-Leste asume lideransa ASEAN iha 2029.
Ministru Negósiu Estranjeiru no Kooperasaun, Bendito Freitas, esplika katak, adezaun Timor-Leste ba ASEAN loke oportunidade foun ba kooperasaun ekonómika, integrasaun rejionál no hametin relasaun ho nasaun membru sira no parseiru diálogu.
Tuir Bendito Freitas, preparasaun ba Prezidénsia ASEAN 2029 presiza koordenasaun entre ministériu sira, instituisaun relevante no ekipa téknika, atu asegura katak atividade sira lao tuir planu no responde ba nesesidade organizasaun.
Iha okaziau nee, Vice-Primeiru-Ministru ba Asuntu Ekonómiku, Francisco Kalbuadi Lay, hato’o informasaun kona-ba preparasaun infraestrutura, inklui alojamentu, hotel, aeroportu no fasilidade relevante sira atu apoia realizasaun atividade ASEAN no simu delegasaun internasionál.
Preparasaun ne’e envolve Komisaun Nasionál 5 ho subkomité 14 no ekipa téknika sira, ne’ebé responsabiliza ba aspetu operasionál, programa no nesesidade sira atu organiza enkontru ASEAN iha Timor-Leste.
PM Xanana Gusmão, nu’udar lideransa Komisaun Nasionál ba Preparasaun Prezidénsia ASEAN 2029, enfatiza importánsia servisu hamutuk entre instituisaun relevante sira atu asegura preparasaun ne’ebé efetiva, koordenada no tuir padraun internasionál.
MNEK Monitoriza Progresu Preparasaun
Iha biban hanesan, Vice-Ministra Asuntu ASEAN, Milena Rangel, informa katak Komisaun Nasionál ba Preparasaun Prezidénsia ASEAN 2029 kontinua hala’o enkontru regulár atu avalia progresu servisu no atualiza preparasaun husi komité no setór relevante sira.
Nia esplika katak, enkontru regulár sira ne’e importante atu monitoriza implementasaun desizaun ne’ebé foti ona iha enkontru sira anteriór, no asegura katak komité no setór sira kumpre sira-nia responsabilidade tuir planu preparasaun.
Milena Rangel mós refere ba dezenvolvimentu infraestrutura, liuliu konstrusaun sentru konvensaun (Convention Center) no preparasaun hotel sira, nu’udar parte importante husi esforsu atu asegura fasilidade adekuada ba delegasaun no partisipante internasionál.
Nia subliña katak komité no setór relevante sira presiza kontinua halo avaliasaun ba tarefa ne’ebé implementa ona, identifika servisu ne’ebé seidauk realiza no hametin koordenasaun atu preparasaun la’o tuir kalendáriu no objetivu ne’ebé determina ona.
Preparasaun ba Prezidénsia ASEAN 2029 sai responsabilidade importante ba Timor-Leste atu hatudu kapasidade diplomátika, institusionál no organizasionál nu’udar membru ASEAN. Koordenasaun entre instituisaun sira, hamutuk ho preparasaun infraestrutura no rekursu umanu, sei sai elementu importante atu apoia Timor-Leste nia lideransa iha organizasaun rejionál ne’e.
(jos)
