DILI, STLTIMORLESTE.com – Aplikante 4.706 ba vaga profisionál saúde hahú teste eskrita iha Komisaun Funsaun Públika (KFP), Matadouro, Dili, Segunda-feira (26/10/2026).
Prezidente Komisaun Rekrutamentu Kandidatu Profisionál Saúde HNGV, Vidal de Jesus Lopes, hatete katak teste eskrita hahú iha Segunda-feira no sei kontinua to’o Novembru.
Nia esplika katak, teste fahe ba turma haat, ho durasaun oras tolu ba kada turma. Teste hahú husi dadeer no sei kontinua to’o lokraik.
Teste eskrita hahú iha 26 no sei kontinua to’o 30 Outubru. Tanba númeru aplikante barak, teste sei kontinua fali iha 4 no 5 Novembru.
Vidal hatete katak, hosi aplikante 8.084 ne’ebé rejista, aplikante 4.706 mak hetan oportunidade atu avansa ba fase teste eskrita.
Nia esplika katak, aplikante sira tenke hetan pontu mínimu 60 atu pasa ba etapa tuirmai. Aplikante ne’ebé hetan pontu 59 ka menus la kumpre kritériu atu avansa.
“Depois teste, aplikante sira bele haree kedas rezultadu iha ekran boot ne’ebé ekipa prepara ona,” dehan Vidal ba jornalista iha edifísiu KFP, Matadouro.
Nia hatete katak, aplikante sira rasik mak determina sira-nia rezultadu liuhusi teste, tuir kapasidade no preparasaun individuál.
Depois teste eletróniku remata, ekipa júri sei halo avaliasaun hamutuk atu determina aplikante sira ne’ebé bele avansa ba fase entrevista.
Vidal hatete katak, prosesu rekrutamentu ne’e presiza kandidatu 478 de’it, maski aplikante rihun haat resin mak partisipa iha prosesu selesaun.
Nia esplika katak, se númeru kandidatu ne’ebé kumpre kritériu la to’o nesesidade, komisaun sei ko’alia ho KFP atu haree mekanizmu apropriadu.
Vidal hein katak, teste ne’e sei ajuda atu hetan kandidatu ne’ebé kumpre númeru vaga disponivel, tuir kritériu rekrutamentu ne’ebé determina ona.
Aplikante Kontente Ho Rezultadu
Aplikante Abinu Maia hatete katak nia sente kontente tanba hetan pontu di’ak iha teste eletróniku, depois gradua iha 2024 no hein oportunidade atu tama servisu públiku.
“Ha’u kontente tanba teste liuhusi KFP hetan valor di’ak, rezultadu hosi esforsu durante ha’u-nia estudu to’o ohin loron,” dehan Abinu.
Nia hatete katak, sei kontinua prepara an atu enfrenta fase entrevista, depois hetan rezultadu ne’ebé fó esperansa atu kontinua iha prosesu rekrutamentu.
Abinu konsidera katak, matéria teste bele sai difísil ba ema ne’ebé la estuda, maibé fasil liu ba kandidatu ne’ebé prepara an no komprende matéria.
“Matéria teste bele fasil, maibé depende ba komprensaun. Se la komprende no analiza didi’ak, bele sala; maibé se komprende, bele hetan rezultadu di’ak,” dehan nia.
Nia esplika katak, tinan kotuk nia partisipa iha rekrutamentu Ministériu Saúde, maibé la pasa iha etapa verifikasaun dokumentu.
Depois ne’e, Abinu servisu voluntáriu iha Sentru Saúde Vera Cruz. Rekrutamentu atual mak primeira vez nia tuir teste iha Funsaun Públika.
Abinu aplika ba vaga enfermagem no hetan pontu 70 iha teste eletróniku.
(dom)
