DILI, STLTIMORLESTE.com — Ministru Obras Publiku (MOP), Samuel Marçal enkoraja nasaun ASEAN sira atu hametin kooperasaun rejionál hodi kombate poluisaun no promove jestaun rekursu bee ne’ebé sustentável.
Ministru MOP hato’o mensajen ne’e iha Simpóziu kona-ba Bee, Pás no Diplomásia, ne’ebé hala’o iha Palásiu Prezidensiál Nicolau Lobato, Bairru Pité, Dili Segunda (26/10/2026).
Ministru afirma katak, poluisaun bee la para iha fronteira nasionál, tanba ne’e, nasaun sira presiza servisu hamutuk atu proteje rekursu bee no ambiente.
Samuel mós subliña katak, kooperasaun transfronteirisu bele hametin konfiansa, prevene konflitu no promove relasaun diplomátika pasífika entre nasaun viziñu sira.
Nia refere ba kooperasaun Timor-Leste no Indonézia iha jestaun kaptasaun hidrográfika, inklui Talau–Loes no Mota Masin, ne’ebé importante ba komunidade sira iha fronteira nia sorin rua.
Nia mós enkoraja nasaun ASEAN atu hadi’a tratamentu bee-fo’er, jestaun lixu sólidu, prátika agríkola responsavel no mekanizmu responsabilizasaun atu hamenus poluisaun.
Nia enfatiza katak desizaun kona-ba bee tenke bazeia ba evidénsia sientífika no informasaun ne’ebé fiável, atu responde ba dezafiu mudansa klimátika, inundasaun no rai-maran.
Nia propoin katak nasaun sira presiza hametin diálogu regulár, fahe dadus, proteje kaptasaun hidrográfika no asegura finansiamentu ba infraestrutura no kapasidade institusionál.
Nia konklui katak kooperasaun rejionál importante atu garante bee seguru, proteje saúde públika no promove dezenvolvimentu sustentável ba jerasaun ohin no futuru.
Alende ne’e Prezidente Repúblika Jose Ramos Horta hatete hato’o agradese ba parte hotu ne’ebe realiza eventu ne’e.
Prezidente hatete bee nesesidade ne’ebe Importante tanba ne’e presiza prezerva no utiliza bee ho diak.
(eme)
