DILI, STLTIMORLESTE.com – Ministru Justisa no reprezentante Estadu-membru CPLP halibur iha Dili atu debate estratéjia kombate fraude online, jogu ilegál no krime organizadu.
Ministru Justisa Timor-Leste, Sérgio da Costa Hornai hatete katak, konferénsia ne’e importante atu hametin kooperasaun entre nasaun membru CPLP hodi prevene no kombate krime transnasionál.
Sérgio Hornai hato’o deklarasaun ne’e ba jornalista sira iha Palásiu Prezidensiál Nicolau Lobato, Bairro Pité, Dili, segunda-feira (26/10/2026), hafoin delegasaun CPLP hasoru Prezidente Repúblika, José Ramos-Horta.
“Ohin vizita ida-ne’e importante tebes tanba reúne ministru justisa no xefe delegasaun husi Estadu-membru CPLP,” dehan Sérgio Hornai.
Nia esplika katak, konferénsia ne’e hala’o tuir estatutu CPLP, hodi debate asuntu estratéjiku ne’ebé sai preokupasaun komún ba nasaun membru sira.
Tuir ministru ne’e, objetivu prinsipál konferénsia mak hametin Estadu Direitu, demokrasia no kooperasaun internasionál, liuhusi medida prevensaun no kombate atividade kriminál.
Tema sentrál konferénsia nian mak kombate fraude online, jogu ilegál no krime organizadu, ne’ebé sai dezafiu ba sistema justisa iha nasaun membru sira.
“Importante atu hametin instituisaun, medida prevensaun no kooperasaun internasionál atu buka solusaun ba problema hirak-ne’e,” afirma Hornai.
Nia subliña katak, fraude online no krime organizadu la’ós problema nasaun ida de’it, maibé dezafiu komún ne’ebé presiza resposta koordinada entre Estadu-membru CPLP.
Hornai mós hato’o orgullu Timor-Leste nian tanba simu reprezentante aas husi nasaun membru CPLP, inklui Portugal, São Tomé e Príncipe, Brasil, Angola, Moçambique no Cabo Verde.
Nia konsidera katak, partisipasaun delegasaun hirak-ne’e fó oportunidade atu fahe esperiénsia, hametin kapasidade instituisionál no dezenvolve estratéjia komún ba prevensaun krime.
Aleinde konferénsia, delegasaun ministru justisa CPLP mós realiza audiénsia ho Prezidente Repúblika, José Ramos-Horta, iha Palásiu Prezidensiál Nicolau Lobato.
Enkontru ne’e sai oportunidade atu hametin diálogu no kooperasaun entre Timor-Leste ho Estadu-membru CPLP, hodi hadi’a sistema justisa no responde ba dezafiu krime transnasionál.
(eme)
