DÍLI, STLTIMORLESTE.com – Prezidente Repúblika (PR), José Ramos-Horta husu ba líder foun sira atu lidera ho korajen, integridade no inovasaun, hodi kria oportunidade ba jerasaun futuru.
Iha Segunda-feira, 26 Outubru 2026, hosi Palásiu Prezidensiál Nicolau Lobato, Prezidente Ramos-Horta hato’o diskursu prinsipál liuhosi plataforma virtuál ba Konferénsia NextGen dala-7, ne’ebé Asosiasaun Jestaun Filipina (MAP) no SGV & Co. organiza iha Makati, Filipinas.
Konferénsia ne’e iha tema “UNCHARTED: Lidera Liuhusi Fronteira, Títulu no Dalan Tradisionál Sira”, ho partisipasaun líder negósiu no inovadór sira.
Ramos-Horta afirma, katak lideransa la depende de’it ba títulu formál, maibé hahú hosi responsabilidade, korajen no kapasidade atu kria solusaun foun.
“Líder loloos sira tenke iha korajen no imajinasaun atu kria dalan foun bainhira dalan ne’ebé estabelese ona seidauk iha.” dehan PR Horta.
Nia mós husu ba emprezáriu no líder foin-sa’e sira iha Sudeste Aziátiku atu kombina vizaun ho humildade, adapta ba mudansa no promove kolaborasaun entre nasaun sira.
Prezidente refere ba integrasaun Timor-Leste iha ASEAN nu’udar ezemplu kona-ba importánsia kooperasaun rejionál no abertura ba perspetiva oioin.
Kona-ba avansu teknolojia no intelijénsia artifisiál (IA), Ramos-Horta alerta katak inovasaun labele sukat de’it hosi efisiénsia ka lukru, maibé tenke konsidera dignidade umana, redusaun dezigualdade no progresu umanu.
Nia subliña katak, susesu duradouru la depende de’it ba autoridade ka dominasaun merkadu, maibé ba legadu no oportunidade ne’ebé líder sira kria ba jerasaun tuirmai.
Iha remata, Prezidente apela ba líder foin-sa’e sira atu lidera ho integridade, fahe koñesimentu no valór, no harii organizasaun ne’ebé fó oportunidade ba ema seluk atu dezenvolve no hetan susesu.
(eme)
