DILI, STLTIMORLESTE.com – Hosi reklamante 1.644 ba vaga profisionál saúde, ema na’in 60 resin mak admitidu atu avansa ba teste eskrita, depois komisaun verifika. dokumentu sira.
Prezidente Komisaun Rekrutamentu Kandidatu Profisionál Saúde HNGV, Vidal de Jesus Lopes, hatete katak reklamasaun nu’udar direitu aplikante nian iha nasaun demokrátiku.
Nia esplika katak, tuir regra rekrutamentu, aplikante sira iha loron lima atu hatama reklamasaun depois submete dokumentu sira.
Vidal hatete katak, ekipa júri halo verifikasaun fali ba dokumentu reklamante sira nian, atu determina se sira kumpre kritériu rekrutamentu ka lae.
Nia esplika katak, durante verifikasaun, ekipa hetan kazu balu, inklui naran ne’ebé mosu iha fatin rua no diploma legalizadu ne’ebé kopia nia kór hanesan dokumentu orijinál.
“Reklamante sira husu atu haree fali dokumentu, tanba sira afirma katak dokumentu sira iha duni,” dehan Vidal ba jornalista iha edifísiu Komisaun Funsaun Públika, Matadouro, Segunda-feira (26/10/2026).
Nia hatete katak verifikasaun fali ne’e identifika reklamante na’in 60 resin ne’ebé dokumentu sira kumpre kritériu, nune’e sira bele avansa ba teste eskrita.
Vidal afirma katak, aplikante hotu-hotu iha direitu atu reklama, maibé reklamasaun la’ós atu kompleta dokumentu foun, maibé atu husu verifikasaun fali ba desizaun no informasaun kona-ba dokumentu sira.
Ihá sorin seluk, Portavoz Kandidata, Almeida Soares dehan, prosesu selesaun dokumentu ba vaga HNGV ne’e la justu no la transparente. Husi total 884 ema ne’ebé submete dokumentu iha Ospitál Lahane husi 17 to’o 28 Setembru, HNGV anunsia iha 12 fulan Outubru katak ema 4.503 mak selesionadu no 3.437 mak la admitidu.
“Kandidatu ne’ebé la admitidu halo reklamasaun hamutuk 1.645 ema. Maibé iha rezultadu reklamasaun iha 20 Outubru, ema 61 de’it mak admitidu fali, no 1.584 nafatin la admitidu, ho ida ne’e ami kestiona pontu balun, ne’ebe ho naran la iha lista rua hotu.
Nia katak, nunee mós Kandidata Nélcia da Silva da Costa, husi área Tekniku Nutrisaun, naran la iha lista admitidu no la admitidu iha faze dahuluk, maibé mosu fali iha lista reklamasaun númeru 2″, nia informa.
Nia hatutan, Kandidata Estrela Nandino husi Tekniku Rekordu Medikál la admitidu tanba la submete kartaun profisionál no sertifikadu bom komportamentu la asina. Maibé hafoin reklamasaun nia liu fali, enkuantu kandidatu seluk ho problema hanesan la liu, resibu iha maibé naran la iha.
(dom)
