DÍLI, STLTIMORLESTE.com – Instituto Superior Cristal (ISC) aprezenta servisu no ekipamentu fisioterapia nian iha Feira Karreira Edukasaun, iha Universidade Nasionál Timor Lorosa’e (UNTL).
Dosente ISC, Marcelino Soares hatete katak, expozisaun ne’e atu ajuda públiku komprende di’ak liu kona-ba fisioterapia nia servisu no benefísiu ba saúde.
Nia esplika katak, ISC lori ekipamentu hanesan boneka anatómika no instrumentu fisioterapia nian, hodi hatudu prosesu aprendizajen no prátika estudante sira iha Fakuldade Saúde.
“Liuhusi expozisaun ne’e, ami hatudu fasilidade saúde iha ISC atu hasa’e estudante sira nia koñesimentu no kapasidade atu aplika iha terenu,” dehan nia ba Jornalista, Kinta (29/10/2026).
Nia hatutan katak, estudante Departamentu Enfermajen, Parteira no Fisioterapia iha ISC hetan oportunidade atu halo prátika iha klinika no komunidade, hodi aplika teoria ne’ebé sira aprende iha sala aula.
Marcelino esplika katak, fisioterapia mak área saúde ne’ebé uza métodu no prosedimentu espesífiku atu ajuda pasiente hadi’a movimentu no funsaun isin nian.
Nia dehan katak, ema balu seidauk komprende di’ak kona-ba fisioterapia, no dala ruma interpreta sala katak servisu ne’e limita de’it ba kaer ka masaja isin.
Tanba ne’e, ISC aproveita feira ne’e atu fó informasaun ba públiku kona-ba prosedimentu fisioterapia no nia benefísiu ba pasiente sira.
Estudante ISC, Fakuldade Saúde, Departamentu Fisioterapia, Pasquila Araujo konsidera katak, expozisaun ne’e importante atu aumenta públiku nia koñesimentu kona-ba área estudu ne’e.
“Liuhusi fisioterapia, ami bele ajuda pasiente ne’ebé sofre stroke no hasoru difikuldade atu movimenta isin, hodi hadi’a movimentu no aumenta forsa isin nian,” Pasquila dehan.
Nia esplika katak, estudante sira aprende kona-ba kazu saúde oioin, inklui pasiente stroke ne’ebé hasoru difikuldade atu movimenta isin no presiza reabilitasaun.
Pasquila afirma katak, fisioterapia bele ajuda pasiente sira hadi’a kapasidade movimentu no hasa’e kualidade moris, tuir sira nia kondisaun saúde.
Atualmente, estudante sira ne’ebé tuir estudu iha Departamentu Fisioterapia, Fakuldade Saúde, ISC hamutuk 17.
(dom)
