DILI, STLTIMORLESTE.com — Primeiru-Ministru (PM), Kay Rala Xanana Gusmão afirma katak, Timor Leste asina Memorandu Entendimentu (MoU) ho Repúblika Korea sei hametin relasaun no koperasaun bilateral entre nasaun rua.
Xanana hato’o informasaun ne’e ba jornalista sira, hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pité, Kinta-feira (29/10/2026).
Nia esplika katak, MoU ne’e kria mekanizmu konsultasaun bilateral atu hametin diálogu no kooperasaun entre Timor-Leste no Repúblika Korea.
“MoU ida ho Repúblika Korea estabelese mekanizmu konsultasaun bilateral atu hametin relasaun entre nasaun rua,” dehan Primeiru-Ministru.
Xanana mós informa katak, Prezidente Repúblika sei halo viajen ba Korea iha loron sira tuirmai. Maibé, nia la fó detallu kona-ba agenda no objetivu espesífiku viajen ne’e.
Aleinde ne’e, Xanana ko’alia kona-ba relasaun Timor-Leste ho Guiné-Bissau no misaun iha Komunidade Países de Língua Portuguesa (CPLP).Nia hatete katak iha pasadu, Guiné-Bissau hatudu insatisfasaun kona-ba deklarasaun balun ne’ebé nia halo. Maibé, tuir nia, situasaun agora muda ona no dalan ba misaun CPLP bele sai posível.
“Agora fó hatene ona katak ita bele ba, no MNEK Timor-Leste sei ba hamutuk ho CPLP,” dehan Xanana.
Alende ne’e, Governu liu husi Konsellu Ministrus aprova ona MoU entre Ministériu Negósius Estranjeirus no Kooperasaun Timor-Leste no Ministériu Negósius Estranjeirus Repúblika Korea kona-ba kriasaun mekanizmu konsultasaun bilateral.
Mekanizmu ne’e sei fasilita troka hanoin kona-ba asuntu bilateral, rejionál no internasionál, no avalia progresu koperasaun iha área komérsiu, ekonomia, saúde, edukasaun, siénsia, teknolojia no agrikultura.
Konsulta bilateral sei hala’o kada tinan rua, ka bainhira parte rua konsidera nesesáriu. Enkontru sei hala’o alternadamente iha Timor-Leste no Repúblika Korea, ho partisipasaun funsionáriu sénior hosi ministériu negósius estranjeirus nasaun rua nian.
(eme)
