DILI, STLTIMORLESTE.com – Prezidente Repúblika (PR), José Ramos-Horta hasoru Ekipa Global Task Force no MSSI atu diskute programa protesaun sosial no nutrisaun.
Prezidente Repúblika, José Ramos-Horta hasoru Ekipa Global Task Force no Ministru Solidariedade Sosiál no Inkluzaun (MSSI), Verónica das Dores, iha Palásiu Prezidensiál Nicolau Lobato, Bairru Pité, Sesta-feira (30/10).
Enkontru ne’e foka ba programa Joint Task Force (JTF) no Sanutrio, inklui nesesidade atu kontinua hetan apoiu husi parseiru internasionál.
Depois enkontru, Ministru MSSI, Verónica das Dores, hatete ba jornalista katak Prezidente Repúblika konvida sira atu diskute asuntu rua ne’ebé relasiona ho protesaun sosiál no nutrisaun.
“Ami hakarak oinsá programa JTF ne’e bele hetan nafatin apoiu husi nasaun seluk ne’ebé hakarak fó apoiu, tanba orsamentu la’ós mai husi Governu, maibé liuhusi parseiru internasionál sira,” dehan Verónica.
Nia esplika katak, programa Sanutrio implementa ona nu’udar projetu-pilotu iha munisípiu tolu, mak Covalima, Ermera no Rejiaun Administrativa Espesiál Oe-Cusse Ambeno (RAEOA).
Programa ne’e foka ba saúde inan no labarik, liuliu inan ne’ebé fó susu no labarik ho idade zero to’o tinan tolu.
“Ami fó ai-han nutritivu ba inan ne’ebé fó susu no mós ba labarik ho idade zero to’o tinan tolu,” nia hatete.
Ministru ne’e hatutan katak, Sanutrio envolve ministériu tolu, mak Ministériu Finansas, Ministériu Saúde no MSSI.
Ministériu sira ne’e servisu hamutuk atu identifika família vulnerável liuhusi dadus Rejistu Sosiál Úniku.
Nia hatete katak, programa ne’e seidauk kobre família vulnerável hotu, tanba implementasaun hahú hosi munisípiu tolu nu’udar projetu-pilotu.
“Ami halo projetu-pilotu uluk, depois bele estende ba munisípiu seluk, maibé presiza orsamentu atu halo Rejistu Sosiál Úniku,” dehan Verónica.
Nia mós temi katak, objetivu programa mak alkansa família vulnerável ne’ebé presiza apoiu nutrisionál, liuliu inan no labarik.
Ministru ne’e hatete katak, asesu ba sentru saúde no distánsia entre komunidade sira sai dezafiu iha implementasaun programa.
Nia esplika katak, verifikasaun kondisaun saúde inan no labarik presiza envolve sentru saúde, atu identifika sira ne’ebé presiza apoiu nutrisionál.
“Maske iha difikuldade, ami kontinua estuda, aprende no hala’o programa ne’e ba oin,” nia afirma.
Ministru Verónica afirma katak, Governu sei kontinua avalia dezafiu sira atu hadi’a implementasaun programa no konsidera posibilidade atu estende ba área seluk.
(eme)
