DILI, STLTIMORLESTE.com – Rotary Asean kompromete atu apoia edukasaun infánsia, formasaun profisionál no dezenvolvimentu juventude iha Timor-Leste.
Iha biban ne’e Sekretáriu Jerál ASEAN, Jimmy Ooi ba Jornalista iha Palásiu Prezidensiál Nicolau Lobato Bairru Pite Sesta 30/10/2026 hatete Organizasaun Rotary Asean reafirma kompromisu atu implementa projetu umanitáriu iha Timor-Leste, ho prioridade ba edukasaun infánsia no dezenvolvimentu kapasidade rekursu umanu.
Reprezentante Rotary Asian hatete katak, Timor-Leste sai membru foun iha organizasaun transfronteirisu ne’e, ne’ebé hala’o atividade umanitária iha nasaun 11 iha Asean.
Nia esplika katak, projetu dahuluk ne’ebé organizasaun ne’e hakarak implementa iha Timor-Leste mak foka ba edukasaun infánsia.
Tuir nia, Rotary Asean iha ona programa oioin, inklui programa harii dame no dezenvolvimentu juventude iha rejiaun Ázia.
Organizasaun ne’e kompostu hosi klube 1.600 no membru Rotary liu 42.000, ne’ebé servisu hamutuk atu promove dezenvolvimentu komunidade.
Nia afirma katak, Rotary Asean hakarak kontinua hametin parseria ho Timor-Leste, liuhusi projetu bazeia ba nesesidade komunidade.
“Investimentu iha kapital umanu, liuhusi formasaun no edukasaun, importante atu prepara juventude ba futuru,” nia hatete.
Nia mós subliña katak, Timor-Leste presiza investe iha formasaun profisionál, liuliu iha área saúde, téknika no nesesidade sosiál.
Tuir nia, dezenvolvimentu kapasidade juventude sei fó oportunidade ba jerasaun foun atu kontribui iha dezenvolvimentu nasaun.
Nia hatutan katak, objetivu ne’e la’ós de’it atu haree rezultadu iha tempu badak, maibé prepara futuru Timor-Leste no rejiaun Ázia ba tinan 50 to’o 100 oin mai.
Rotary Asean hein katak, liuhusi servisu hamutuk no parseria ema forte, bele kontribui ba dezenvolvimentu komunidade no harii rejiaun Ázia ne’ebé forte no unifikadu.
(eme)
