DILI, STLTIMORLESTE.com – Prezidente Republika (PR), José Ramos-Horta fó Medalla Ordem de Timor-Leste ba Embaixadora Caitlin Wilson, nu’udar rekoñesimentu ba nia kontribuisaun.
Prezidente Repúblika José Ramos-Horta hato’o apresiasaun ba Embaixadora Austrália, Caitlin Wilson, tanba nia servisu, amizade no kontribuisaun ba Timor-Leste durante nia misaun diplomátika.
Atribuisaun Medalla Ordem de Timor-Leste ba Embaixadora Caitlin Wilson reflete rekoñesimentu no gratidaun husi povu Timor-Leste ba nia dedikasaun no kontribuisaun.
Prezidente Ramos-Horta, iha nia mensajen, iha Palasiu Sesta 30/10/3026 hato’o apresiasaun ba Embaixadora Caitlin no Governu no povu Austrália tanba amizade no apoiu ne’ebé kontinua durante tinan sira.
Nia mós hato’o hahalok boas ba Embaixadora Caitlin Wilson ba nia kapitulu foun, ho saúde di’ak, susesu no ksolok.
“Ha’u desezu susesu, saúde di’ak no ksolok iha ninia kapitulu tuirmai. Nia sempre simu iha Timor-Leste,” dehan Prezidente.
Prezidente reafirma katak Timor-Leste kontinua valoriza amizade no parseria ho Austrália, nu’udar parseiru importante iha dezenvolvimentu no seguransa nasaun nian.
Nia mós lembra katak Austrália sai parseiru dezenvolvimentu no seguransa ba Timor-Leste dezde restaurasaun independénsia iha tinan 2002.
Enkuantu ne’e, Embaixadora Caitlin Wilson, hafoin simu medalla, hato’o nia sentimentu kona-ba remata misaun diplomátika iha Timor-Leste.
“Atu dehan liafuan adeus ne’e nunka fasil. Ha’u sei husik hela Timor-Leste ho sentimentu ksolok no hanoin nafatin povu Timoroan sira,” nia afirma.
Nia hatutan katak Timor-Leste sei kontinua iha nia fuan, no nia sei lembra nafatin amizade no esperansa ba futuru nasaun ne’e.
Timor-Leste no Austrália, nu’udar nasaun viziñu, sei kontinua hametin relasaun diplomátika no parseria iha área interese komún sira iha futuru.
(eme)
